SOIFUA MANUIA E ALA I LE FAAMASANI I LE FAAFETAI

(tusia: Judy Mata’utia)
 
Pe moni ea e mafai ona e soifua maloloina ma sili atu lou fiafia e ala I le faata’ita’i ma le faamasani i le maua o le loto faafetai? O le tali pu’upu’u o le ioe.  Ua faaalia mai e nisi o sailiiliga, o le loto faafetai e mafai ona faatupulaia ai le fiafia o tagata, faaleleia ai mafutaga, ma atonu e mafai ai foi ona tete’e atu i nisi o faalogona e pei o le faanoanoa, atuatuvale, aemaise ai foi ma mafaufauga e fia pulea o le soifua.  E mafai foi e le loto faafetai ona faatupu teleina ai le loto ma faalogona lelei mo le tagata lava ia.  O nisi o suesuega ua faapea, o le faaalia o le agaga faafetai e mafai ona suia lelei ai le mafaufau.  E faatupu teleina ni vaega o le faiai o le tagata lea e faaleleia vave ai ou lagona, e pei o le lagona o le fiafia ma le soifua manuia.  I aso taitasi a’o tatou faataitaia le agaga po’o le loto faafetai, e mafai ona tatou fesoasoani e faamalosia vaega nei o tatou mafaufau ma i’u ai ina tatou fausia le agaga faafetai tumau, ma faaleleia atili ai le tagata lava ia. 
 
O le loto faafetai e faateleina ai lou fiafia:
O le loto faafetai e feso’ota’i ma le fiafia.  O le faaalia o lagona o le talisapaia ma faafetai i isi ma tatou lava ia, e tula’i mai ai lagona lelei ma lagona o le fiafia ma le faamalieina.  O tagata e fai ma o latou masani le faaalia o le agaga faafetai e tele foi le  latou fetufaaa’i faatasi ma isi, latou te ofoina atu le latou fesoasoani ma iai se naunauta’iga e faamagalo ni mea ua tutupu.   O le faigofie ia o le maua i le loto faafetai ma e iai lona a’afiaga i tagata o le tatou siosiomaga. A faaalia le tatou agaga faafetai ona o isi, o le tatou faamalosiauina foi lea oi latou e tali atu i ni auala lelei i isi – ma tupu faasosoloina ai o mea lelei.  E te maitauina ou faalogona pe a e fai meaalofa i se tagata pe e te faamalo foi i ai?  E iai tulaga faasaienisi e lagolagoina faalogona nei – pe a e agalelei i isi ma mafaufauina mea lelei mo isi, e faatupu teleina ai le lelei o ou faalogona ma e mafai foi ona faaitiitia ai le popolevale ma mafai ona tatou gafa taulimaina nisi o tulaga e fetaia’i ma tatou.
O le loto faafetai e faaitiitia ai le atuatuvale, popolevale ma le faanoanoa:
I le aluga o tausaga, ua maua ai o le faamasani ma le faataitai ona maua i le loto faafetai e mafai ai ona tatou taulimaina le tele o le atuatuvale ma le popole aemaise ai ma le faanoanoa e feagai ma tatou.  A faaitiitia le atuatuvale, e faaitiitia foi e le loto faafetai le faanoanoa ma le popolevale.  O le iai foi o ni au tusitusiga ma faamaumauga e faatatau i le loto faafetai po’o le fai ma e toe faaleoina ia te oe lava ia o le loto faafetai, e mafai ona fesoasoani i le ave esea o faalogona faale-lelei. 
 
 
O le loto faafetai e faaleleia ai lou soifua maloloina faale-tino:
O tagata e iai le loto faafetai, e soifua maloloina fo’i.  O le faamasani ma faataitai i le loto faafetai e faaitiitia ai le maualuga o le toto ma puipuia o tatou fatu i le maua i nisi o ma’i e mafua mai i o tatou faalogona.  E mafai ona faaleleia atili o tatou mafutaga aemaise o tatou feso’ota’iga ma nisi pea tatou faamasani i le maua o le loto faafetai.  E fesoasoani foi mo le tatou fausiaina o ni so’otaga o uo ma aiga, ma maua ai ni mafutaga umi aemaise o se olaga soifua lelei. 
 
Fautuaga mo le atina’eina o le fiafia ma le soifua lelei faatasi ai ma le loto faafetai:
E iai ni mea faigofie e mafai ona faia e amata ai ona faamasani i le maua o le loto faafetai i aso taitasi:

• O lou amanaia ma faafetai mo oe lava ia. I aso taitasi, faata’ita’i ona e faaleoina ia te oe lava ia, ni mea lelei se 5 e faatatau ia te oe. Atonu e faigata i le amataga, ae fai fai lava e masani pea faamasani.
• Tusitusiga.  E te le mana’omia fua se tusi po’o se api e iai se loka e amata ai ona e faata’ita’i.  Faaaoga so’o se api aoga, o lau kalena faale-aso, po’o ni fasi pepa ma faamaumau i lalo nisi o mea e maua ai oe i le loto faafetai i aso taitasi.
• Faia se mea e lagona ai e se isi le faapitoa o ia. Asiasi ma faailoa atu i se isi lou faatauaina o ia.  Ia latou lagona le faapitoa o latou e ala i le faaalia o lou loto faafetai i lou fai atu i ai ‘faafetai’.
• Saili sau uo loto faafetai. Faailoa atu i se isi tulaga o lo’o e faia i aso taitasi e faaalia ai lou faafetai – o lou aiga, fanau, po’o se uo.  Faatulagaina ni nai minute i se vaiaso e faasoa ma faailoa tulaga o lo’o e loto faafetai ai. 

O le mea e sili ona taua, ia e fiafia:
Ia e fiafia i so’o se faamanuiaga pe tele po’o le itiiti, faataua lou fiafia, ma ia faafetaia le taimi ma le avanoa ua maua.  O le taliaina o le fiafia e faatupuina ai ia tatou le agaga faafetai mo mea uma ua tatou maua ma avea ma faamalosiau mo i tatou.  O le faafetaia o tatou taumafaiga e saunia ma tatou tapena ai mo faigata atonu e feagai ma tatou i le lumana’i.  O le faamasani ma faata’ita’i i le loto faafetai ma le agaalofa e taua i taimi uma – o lea amioga e mafai ona iai sona a’afiaga e tu’u faasolo.  Afai e te agalelei ia te oe lava ia ma e faata’ita’ia le loto faafetai  mo isi, e amata foi ona faata’ita’i tagata ia te oe ma avea ai le lalolagi ma se nofoaga lelei.