​SE AGANU’U EA O SAUAGA?

​Tusia: Judy Mata’utia
O le aganu’u e mafai ona faauigaina faapea o manatu, tu ma aga, ma amioga faa-agafeso’ota’i o se vaega o tagata, po’o se atunu’u. I le avea ai o tatou ma tagata Samoa, oi tatou o ni tagata e mitamita, aemaise
lava I le tatou aganu’u. Tatou te faataitaia, faatinoina ma tatou faalauiloaina.
Ae faafefea la sauaga? O fea e sau ai sauaga, ae aisea e mafua ai, ae po’o se vaega o le tatou aganu’u,
aemaise o sauaga e faasaga I tama’ita’i, fanau ma i latou e vaivai? Afai o le tulaga lea, ua tatau loa la ona suia
le tatou tala faamatala, tala faasolo, tala faifai pea, tala feavea’i, po’o le tala faasolopito o tagata Samoa!
O mea e tutupu ma tula’i mai, o ripoti ma suesuega, o faamatalaga ma faamaumauga, e faaalia mai ai se
ata o le tatou lotoifale, atonu tatou te le mitamita e faatalanoaina lea tulaga. Ae atonu o se mea sese tele lea, aua
I le avea ai o tatou o se nu’u, o se aiga, o tagata ta’itasi, e tatau ona mafai ona tatou faatalanoaina lea tulaga. E
le mafai ona foia se faafitauli sei vagana ua talia ma faailoa e iai se faafitauli. O le tele o tatou, o le tatou
vavevave ia I luga o le upega tafa’ilagi ma faaalia o tatou manatu ma lagona I mataupu e faatatau I sauaga faale-
itupa, ma pei e faaalia ma faafoliga mai tatou te le taliaina ia faiga. Ae pe moni ea lea tulaga, pei o se galu foi
lea na’o na faafua ae le fati?
O lo’o tula’I mai foi faafitauli ogaoga I le soifua maloloina o tama’ita’i Samoa o lo’o feagai ma sauaga.
O lo’o faapea mai faamaumauga a le malo aufaatasi, o tama’ita’i Samoa ua a’afia I se mafutaga ma se paaga, e
46% oi latou nei ua a’afia I se tasi po’o le tele foi o ituaiga sauaga e faia e se paaga. O sauaga faale-tino o le
ituaiga sauaga ta’atele lea ma e 38% o tama’ita’i Samoa ua a’afia, soso’o ai le 20% o sauaga tau feusuaiga ma
sauaga faale-lagona e 19%. Mai latou e a’afia I sauaga faaletino, e 30% oi latou na ripotia nei sauaga ua a’afia
ai manuaga o le tino. Mai latou na ripotia le sauaina I sauaga faale-tino mai se paaga, e 24% oi latou nei sa ta
tu’I, fekiki pe na sauaina ao ma’I taga, ma oi latou o lo’o faia sauaga nei o le tama lava o le pepe lea e le’i fanau
mai. Mai tama’ita’i uma na ripotia mai le a’afia I sauaga e 78% ua a’afia I sauaga faalotoifale, 11% ua a’afia I
sauaga tau feusuaiga, ma e 11% na a’afia pe na faia iai ni faiga faao’olima mataga.1
Pe tusa ma le 97% o tama’ita’i ua a’afia I sauaga faalotoifale, latou te le’I ripotia o latou sauaga I leoleo,
ma e 36% oi latou nei latou te le’i ripotia ona sa latou faapea o tulaga nei o tulaga na’o le va lava o le tane ma
lana ava, 8% e le’i riporia ona faapea o le’o se tulaga matuia ma e 7% e le’i ripotia ona e sili atu ma
faatumauina pea le alofa I le toalua. Mai latou nei e 96% o le e faia sauaga o ta’i toalua o nei tama’ita’i. Pe
tusa ma le 70% o tama’ita’i e iai le latou manatu e faapea e iai le alaga tatau e sauaina ai e alii o latou ta’i
toalua.2
E tatau ia’i tatou o tagata Samoa ona faia se suiga e le na’o le tatou faailoa ma faafoliga se suiga ae ia
faia se galuega po’o se faatinoga o suiga, ona o le mea e tatau ona faia, ma o lo’o faia uma e le lalolagi atoa,
aemaise ona e tutusa o tatou talitonuga, o sauaga e le’o se vaega o le tatou aganuu. E tatau ona tatou auai I
suiga ona e le tatau ona sauaina o tatou tina ma tama’ita’i, e tatau ona tatou auai ina ia puipuia o tatou fanau. O
suiga e amata mai totonu o tatou aiga, ma e mafai ona tatou oo atu ono faia suiga I se tulaga faale-malo, pe afai
e amata ona tatou talanoaina tulaga ma mataupu nei I totonu o le tatou lotoifale, aiga ma I totonu o nuu ma
afioaga ta’itasi. O le faafitauli o sauaga faale-itupa e le’o se faafitauli tau na’o tama’ita’i, ae o se faafitauli e
tula’I mai I totonu o aiga uma, tagata uma, le tatou atunuu atoa ma le tatou aganuu.

1. https://thecommonwealth.org/news/blog-samoas-response-violence-against-women-and-girls-can-guide-other-
countries#: ~:text=Almost%20nine%20in%2010%20Samoan, five%20women%20has%20been%20raped.