​PULE I LE OLA I LO’U LOTOIFALE

​PULE I LE OLA I LO’U LOTOIFALE
Tusia:  Judy Mata’utia
 
O Setema o le masina ua atofaina mo le puipuia mai o tagata mai le pulea o latou soifua, ma e faatupulaia ai le malamalamala ma le silafia I lea tulaga aemaise o le mafai ona faia o faatalanoaga ma faasoa e faatatau I le pulea o le soifua.  O mafaufauga e pulea le soifua, e pei o tulaga o le soifua maloloina faale-mafaufau, e mafai ona a’afia ai so’o se tasi e tusa lava po’o le a le matua, po’o le itupa ae po’o le a lava sona talaaga.  O mafaufauga e fia pulea le soifua, e ui ina taatele, e le tatau ona tatou manatu o ni faiga masani ae e masani ona faaalia mai ai nisi tulaga e sili atu ona ogaoga ma matuia. 
 
O se taimi lelei foi lenei e faatalanoaina ma faalauiloa ai nei mataupu ua tele ona tapu ma faasaina ona faatalanoaina e o tatou tagata, tatou aiga, aemaise o tatou fanau.    E tatau ona iai se suiga i manatu ma mafaufauga a le lautele ina ia faatupulaia le faasalalauina o faamatalaga ma aoaoga taua e faatatau I le pulea o le soifua, faapea le faatumauina o le iai o le faamoemoega mo a taeao mo e ua a’afia ona o se tasi ua pulea I lona soifua.  Tatou te a’afia uma lava I le pulea o le soifua, e le na’o le tagata ua faia lea tulaga o le toe pule lava I lona soifua.  O le pule I le ola e a’afia ai aiga ma uo I se taimi umi lava, talu ona toesea se tasi e pele ia latou.  E ui ina taua le soifua maloloina faale-tino, ae tutusa lava ma le taua o le iai o le soifua maloloina faale-mafaufau ma le soifua manuia e fesoasoani pe a tatou a’afia I tulaga nei I ni taimi umi.  O le a’afiaga e foliga mai e sili atu ona faalauteleina I nofoaga laiti ma le vavalalata e pei o Amerika Samoa, aua na’o le 55,000 lona faitau aofa’I, ma o le tele o aiga o aiga lautele. 
 
O se tasi o auala e fesoasoani e puipuia mai le pule I le ola, o le faatupulaia o avanoa e maua ai ma mafai ona togafitia ai mo faanoanoaga, popolega, po’o le atuatuvale foi.  Peitai, e fai sina faigata ona maitau ma iloaina faailoga po’o foliga vaai o faanoanoaga ma popolega e feagai ma le tagata, e le faapea e faaalia ni uiga ese pe faapitoa e tagata uma e a’afia I tulaga nei.  E le gata ina ia tatau ona tatou mataalia ma maitauina le tupulaga talavou, ae tatau foi ona faapena I tagata matutua.  O le soifua maloloina faale-mafaufau o oe po’o se pele ia te oe, e le mafai ona tatou le manatu mamafa tele I ai.  Po’o se mataupu ua leva ona e tauivi ma feagai ai po’o se faalavelave ua faavaivai ai lou tagata, aapa i uo, ai, po’o se faufautua e faamama avega I le sailiga o se fesoasoani.  E leai ma se tulaga e tatau ona e matamuli ai I le aapa atu mo se fesoasoani. 
 
I nai tausaga ua se’i mavae atu nei, na si’isi’i ai I luga le numera o le pule I le ola I Amerika Samoa.  A’o taula’I le tele o le lalolagi I le Koviti-19 I le 2 tausaga talu ai, sa faapena foi Amerika Samoa, ae sa faaopoopo I ai ma le faateleina o le tupulaga talavou na maliliu I le pule I le ola I Amerika Samoa.  Ina ia tatou fesoasoani i le taofia o lenei faafitauli, ua tatau ma onomea ona amata ona tatou talanoa.  O le mea e leaga ai, o tatou o ni tagata tatou te le fiafia e faatalanoaina le autu taua lea, ae pei ua faataliga tutuli iai ma le faatalanoaina ai lava.  Seiloga lava la e mafai ona tineia ese ia ituaiga mafaufauga, e tatau lava la ona faia le tatou vaega ma le tatou galuega. 
 
Afai e te fetaiai ma se tasi o talanoa e uiga I le oti, pe ua fia pule I le ola, ua iai faalogona o le leai o se faamoemoe, tuua toatasi, pe ua leai ni faalogona, pe lagona le maasiasi, po o le faia foi o faamatalaga e faatatau I le pule I le ola I luga o le upega tafailagi, atonu o nisi nei o faailoga vaaia e faailoa mai ai tulaga o feagai ma latou, ma o lo o taumafai foi e aapa mai mo se fesoasoani.  O le malosi ma le iai o le soifua maloloina faale-mafaufau, faatasi ai ma le maufetu’una’I, atonu o le tele foi lena o se avanoa e mafai ona tatou le a’afia ai I tulaga o le pulea o le soifua, ma mafai ai fo’i ona tatou lagolagoina ma fesoasoani atu ia latou o lo’o feagai ma tulaga nei.  Afai e te fia faatalanoaina atili lea mataupu, faafeso’ota’i mai le mau a Amerika Samoa e tete’e atu i sauaga i le 699-0272.
 
 
 
 
Resources:
https://amchp.org/2021/10/28/youth-led-suicide-prevention-efforts-in-american-samoa/
http://www.asalliance.co/tusitala---monthly-articles/remembering-you-are-not-alone-its-suicide-prevention-awareness-month
 
 
.