O FAIGA TUTUSA MA FAIGA LELEI MA LE LE FAAITUAU

Tusia:  Monica Ve’ave’a
O faaupuga nei ‘o faiga tutusa’ ma ‘faiga lelei ma le le faaituau’,  e masani ona fesuisuia’i lona faaaogaina.  O lea la lona eseesega – ae aisea fo’i e taua ai le tatou malamalama i ai, faailoa ma faatauaina?  Se’i tatou tilotilo la i lona faauigaina faigofie.
O le uiga ‘o faiga tutusa’ o le mafai lea ona maua e tagata ta’itasi po’o le toatele ia alaga oa po’o avanoa tutusa.  O ‘faiga lelei ma le le faaituau’ o le mafai lea ona iloa e eseese tulaga o tagata ta’itoatasi, ma e tatau ona maua ia alaga oa ma avanoa e manaomia ina ia ausia ai e tagata uma se taunuuga tutusa. 
O ‘faiga lelei ma le le faaituau’ e mafai ona faauigaina i le avatu lea i tagata uma mea latou te manaomia ina ia faamanuiaina ai latou.  O lona uiga, e le’o le avatu i tagata uma le mea e tutusa lelei.  Afai o le a avatu i tagata uma avanoa e tutusa lelei, ma le faamoemoe e ono tutusa ai tagata uma, o lae e faapea na amata tagata uma i le mea e tasi – e tele se le fetaui o lea tulaga ona e le tutusa tagata uma.
I nisi o taimi e mafai ona fesea’i le faauigaina o ‘faiga tutusa’, ona e faapea nisi e tatau ona faia faiga tutusa e tutusa ai iuga e maua e tagata uma.  O talitonuga nei ua tatou masani ai mai le tatou tuputupu ifo ma aoaoina ai tatou i faiga tutusa, ae o le mea moni lava, o iuga tutusa e maua pe afai na tutusa mai le amataga.
O le faaaogaina o ‘faiga lelei ma le le faaituau’ mo le agai i luma o taumafaiga a tamaitai – o faiga tutusa e taula’i i le maua e itupa uma o avanoa tutusa, e pei o le aia a tamaitai e palota ai. Peitai, e tele nisi o tulaga e manaomia e tamaitai e ese mai i le mafai ona palota.  E manaomia ona latou auai atu i ni faiga masani e faatupulaia ai le lagolagoina o I latou I vaega uma o le latou soifuaaga, mai lava I aoaoga e o’o atu i galuega faapea ma le itu tau le soifua maloloina.  O le mataupu tau i itupa e tele ona magaala, ma o tamaitai o se vaega e tele ni ona eseesega, mo se faataitaiga, o nisi o tulafono e faamanuiaina ai nisi o tamaitai, atonu e le faamanuiaina ai nisi.  E manaomia se suiga mai i faiga tutusa i itupa i faiga lelei ma le le faaituau i itupa mo se aga’iga’i lelei i luma.