O LE FAAMALOSIA O LE SOIFUA MALOLOINA FAALE-MAFAUFAU E ALA I LE FAAITIITIA O LE FIAMALOSI

Tusia: Judy Mata’utia
I faiga paaga a Le Mau ma le Matagaluega O Aoaoga I Amerika Samoa ua maua ai e Le Mau le avanoa faaauro e faataunuuina ma faaauau ai nisi o latou polokalame fai e ala i le ulufale atu i nuu ma afioaga eseese e faatinoina polokalame mo le faamalosia o le soifua maloloina faale-mafaufau e ala I le faaitiitia ma le taumafai ina ia faamutaina le fiamalosi.   E lima aso Sa soso’o na amata ia Novema se’ia o’o atu ia Tesema 2022 o faagasolo nei faatalanoaga i afioaga ta’itasi e aofia ai Fagaalu, Fagaitua, Malaeloa, Futiga, ma Nuuuli ma na aofia ai  tagata o aulotu eseese e amata mai i fanau iti e 4 tausaga se’ia o’o atu i tama ma tina matutua i le 80 tausaga. 
Sa vaaia le sagisagi fiafia mai o tagata o ekalesia mo le mafutaga ma se faatalanoaga, ma na maua le avanoa e faatalanoaina ai le tulaga o le latou malamalama ma le silafia e faatatau i le mataupu o le fiamalosi, ae po’o a faailoga ma foliga o lenei faafitauli.  Sa mafai ona faasoa foi e faatatau i le taua o le tatou soifua manuia, oa mea e mafai ona tatou faia tatou te maua ai pea le soifua manuia, aemaise o tatou faalogona pea i ai lo tatou soifua manuia.  Na maitauina le tiotio o fofoga o le aofia i le faasoa atu i faailoga vaaia o le fiamalosi, e taua i matua le maitauina o tulaga nei ina ia mafai ona fesoasoani ai i alo ma fanau o lo’o faataunuuina ai e nisi le fiamalosi.  Se isi vaega taua lava o le mafai ona talanoa o matua i o latou alo e faatatau i le fiamalosi, e taua le silafia o upu ma faaupuga e faaaoga ina ia aua nei musu ai le tamaititi e faailoa mai tulaga nei.  Ua tele foi se malamalamaga ma le silafia o le atunuu e faatatau i sauaga i luga o le upega tafailagi – o faaupuga a tagata e lafo mai, aisea e mafua ai lea tulaga, ma o a nisi auala latou te faia ai nei tulaga.  O nisi nei o vaega eseese na mafai ona faatalanoaina o le toatele sa mafai ona auai mai.
O sau feau? O se isi lea o ulutala o nisi o faatalanoaga na faasoa iai le toatele, ma e ese le matagofie o le faasoa ma faaupuga na mafai ona faailoa mai e nisi, ma e taofi eseese foi aofia uma na faatalanoaina lea tulaga.  O le tulaga na vaaia ai ni suiga o le mafai e alo ma fanau ona faasoa ma fetufaai mai o latou manatu a’o faatasi ai ma matua i totonu lava o le nofoaga e tasi.  E mo’i lava o lo’o maitauina le fefe o le fanau ae na taumafai lava e faasoa mai. 
O le poto e iai ona matafaioi!  O se isi lea tulaga na mafai ona faatalanoaina ma na faasoa le toatele i le taua ma le saolele o lea faaupuga ma taualuga ai loa i le faaleoina faatasi e le aofia o le TAUTOGA MO SE SUIGA.  I le tautoga na tauto ai le aofia latou te tautala ma le agalelei, e le agaleaga pe faatiga i se tasi, e aapa atu ma taliaina, e faia mea sili e lagona ai e isi le faatauaina o latou, faaaloalo ma aofia ai tagata uma, faia le vaega a le tagata lava ia, e taofia ai le fiamalosi I totonu o latou siosiomaga, ma tulai maim o le mea tonu, ma o le iuga o le fiamalosi e amata atu i a latou.
Na faaiuina ma le manuia lea taumafaiga, ma o se amataga lea o ni faiga paaga ma le toatele i totonu o nuu ma afioaga aemaise o ekalesia, ma ua toe sauni atu fo’i Le Mau e faaauauina nei faatalanoaga mo nisi o ekalesia mo le vaega 2 o lenei polokalame ma lenei faiga paaga matagofie.