VA TAPU’IA: SAUAGA I TOTONU O FAIGAUO A TUPULAGA TALAVOU

Oute mua’i tapu’i le tapu o alo ali’i ma ou taia le tu tafa’itoa aua o lea ua ali’itia fanua. Ua tatou feiloa’i i le magafetau soifua i le alofa ma le agalelei o le Atua ma e mua ai la le fa’asao ia manuvao ma momoli lapalapa o malo e sulaina ai le alofa tunoa o le tatou Tapa’au Sili i le lagi. O mamalu ma faigata o lenei aso o le a lē toe o’o i ai se upu auā o lea ua mae’a ona paepaeulufanua e le fofoga o le tatou porokalama. Ae tau ia ina ‘ou pa’i i le vai o le tama ma ‘ou fa’atulou i le tatou fa’atasiga, tulou, tulou, tulou lava. E fa’atalofa atu i le Susuga i le Fa’atonu ia Tofaeono ma lona ofisa mamalu, le atunu’u fa’afofoga tapua’i, aemaise le aofia ua fa’atasi mai i lenei fa’amoemoe. Talofa lava! Malo le soifua manuia ma le lagi e mama i lenei taeao fou o le Alii.
O le fa’asoa i lenei aso e fa’aautu lea i le mataupu ogaoga ua sasao fa’aafi nei, o le Teen Dating Violence/Sauaga i totonu o Faigauo a Tupulaga Talavou. A tatou talanoa i le Teen Dating Violence/Sauaga i totonu o Faigauo a Tupulaga Talavou, ua tatou talanoa i a’afiaga ogaoga o le tino ma le mafaufau e mafua mai i aga a se tagata ua le tau tamali’i, le mafaufau, aemaise o le lē malamalama i le fa’asinomaga o le soifuaga fa’asamoa. Fa’ata’ita’iga: O le fa’ao’o lima o le uo tama i lana uo teine (fasi). O le olaga o Samoa ua uma ona mavaevae ma tu’umatamaga. O lona uiga, e so’o se Samoa moni lava e i ai lona fa’asinomaga e fai ma ta’iala i lona soifuaga.
 O le tasi la o vaega o le fa’asinomaga o le soifua o le tama ma le teine Samoa o le va tapu’ia. O le a le va tapu’ia? O le va tapu’ia o tulaga ia e sa ma tapu ma e lē tatau ona tupu i le va nonofo o tagata. Ae fa’apito augafa se leo i le va tapu’ia i totonu o se faigauo, e pei, o le va nonofo ai o le uo tama ma lana uo teine. I le fa’asamoa e sa ma tapu ona o’o le lima o le tuagane i lona tuafafine ma e fa’apena fo’i le tuafafine i le tuagane. Aisea, auā fo’i o fanau o pelega o aiga ma e puipui malu i ai matua ma aiga. E pei ona pele i le tuagane lona tuafafine, e tatau fo’i ona fa’apena ona pele i le uo tama lana uo teine. O lona uiga, o le va nonofo lea e tatau ona fealoaloa’i - alo mai, alo atu (va fealoa’i).
 E lē toe po mala e i fa’afitauli ua tutupu mai i totonu o si o tatou atunu’u i faigauo a tupulaga talavou. Ua logo tala i le fa’ao’o lima o le uo tama i lana uo teine. O le upu moni, e mafua ona tupu sauaga i totonu o faigauo ona o le lē malamalama o tupulaga talavou i o latou fa’asinomaga ma fa’ataua. Aua ana malamalama i le fa’asinomaga ma fa’ataua le va tapu’ia, e lē tupu le fa’afitauli lea o le teen dating violence/sauaga i totonu o faigauo a tupulaga talavou. Ana malamalama i le fa’asinomaga ma fa’ataua, e iloa tausi le va nonofo i totonu o le faigauo. Tupulaga e, o le va tapu’ia o se tasi lea o vaega taua i le soifuaga fa’aSamoa ma e tatau ona e silafia ma malamalama i ai auā o i tonu lava e maua ai le nofo lelei ma le nofo fealofani. Auā a malamalama i le fa’asinomaga ma le va tapu’ia, e te iloa fo’i fuafua au fa’atinoga ma gaioiga.
Tupulaga, e taua lou taumafai e atina’e se faigauo po’o se mafutaga e soifua maloloina ma lelei (healthy relationship). E fa vaega oute manatu e taua i le atina’eina o se mafutaga/faigauo soifua maloloina ma lelei:
1. Fa’aaloalo (Respect) - E taua le i ai o le fa’aaloalo i totonu o se mafutaga/faigauo. O le fa’aaloalo lena e fetufaa’i ai lagona ma manatu i se aga e tamali’i ma tausa’afia, ma e talia gofie ai fo’i lagona ma ni manatu pe a o’o ina fa’asoa.
2. Trust (Talitonuina) - E taua le talitonuina o le mafutaga. O ina e aveesea ma fa’aitiitia ai le tulaga lea o le masalosalo vale ma le fuā.
3. Honesty (Fa’amaoni) - O le fa’amaoni e mana’omia lea i totonu o se mafutaga aua e mausali ai le mafana ma le talitonuina o le mafutaga/faigauo.
4. Tulaga Tutusa (Equality) - O le fai tutusa o totino o lo’o i totonu o se mafutaga/faigauo e mafua ai ona fiafia ma maua’a le mafutaga. E leai ai foi se musu ma le fiu gofie.
 Oute iloa e tele isi fa’afitauli o lo’o feagai ma le tupulaga talavou ma oute fia fa’asoa atu ai nei vaega e fesoasoani ma fa’atupu manatu i le tupulaga talavou aua le taumafai e fo’ia fa’afitauli o lo’o feagai ma i latou:
1. Tatalo ma Galue: Ia to’aga e tatalo ma galue. Ia saili i le fesoasoani mai le Alii ma galue e saili auala e maua ai le fesoasoani i se mataupu.
2. Tusi lau fa’asinoala (Create a plan) - Ia tusi sau fa’asinoala e fai lea ma ta’iala i au taumafaiga ina ia e ausia lau sini autu.
3. Fesili mo se Fesoasaoni (Ask for Help) - A i ai se fa’afitauli o feagai ma oe, ia aua le matamuli e fesili mo se fesoasoani. O le fesili e maua ai le tali i se mataupu o lo’o feagai ma oe. E taua fo’i le taumafai o i latou o lo’o fesili atu i ai se tagata mo se fesoasoani e aua nei fa’asoaina atu nei fa’afitaulu i se isi tagata auā o ina e mafua ai le faitala ma le feavea’i tala, ma atili ai lava ona mamafa le avega a le tagata o lo’o feagai ma le fa’afitauli.
 4. Talia le Lagolagosua mai o i si tagata (Accept Support): Ia talia le lagolago ma le fesoasoani atu o se tasi ia te oe. O le fesoasoani lena e fa’amāmā avega mo oe a’o feagai ai ma fa’afitauli o le olaga.
Tupulaga e, o ni isi na o fautuaga e tu’u atu i ou autafa e toe timata ai le upega ma toe sasa’a ai le fafao aua le aga’i i luma. Ia fa’ataua lou fa’asinomaga ma ia aloa’ia le va tapu’ia e maua ai le mafutaga lelei ma le soifua maloloina.
Ua uma lenei fa’asoa o fa’aaogaina pea le Gagana Samoa ona oute talitonu e tatau ona fa’ataua, fa’aolaola, ma fa’amuamua le tatou gagana, aua a tatou fa’amuamua i ai, e toe afe mou. O le tatou tiute ma le matafaioi o le puipui ma fa’aolaola le tatou Gagana ma le Aganu’u Samoa, o le tatou palefuiono lena e iloa ai oe ma a’u i le lalolagi.
E momoli atu le fa’afetai i le Mau mo le Fa’amalosia o Aiga/Alliance, Susuga i le Fa’atonu ia Tofaeono ma le ofisa mamalu mo le avanoa ua maua e lenei auauna fa’atauva’a ma le vaivai e avatu ai se lagona ma ni motuga’afa aua lenei fa’amoemoe. Fa’afetai tele lava, o la outou pule lea. O se upu ua pa’ōpapa poo se peau ua laga vale i le gagana, ia malu ave i fale i finagalo ma loto, ma oute matua atu i ina i lo outou titi faitama e magalo ai lo’u vaivai ma le fa’atauva’a.
Ia manuia tele Amerika Samoa le atunu’u pele, le Ofisa o le Alliance, fa’apea le mamalu o le tatou fa’atasiga i le alofa ma le agalelei o le Atua. Soifua ma ia manuia.
Saunoaga a Kiso Skelton
TEEN DATING VIOLENCE AWARENESS VIRTUAL CONFERENCE 2022
Mati 3, 2022