UA LAVEA FUA FOAGA E LE’I FAI MISA (O le tu’ua’i fuaina o i latou ua a’afia i sauaga faafeusuaiga)

written by:  Judy Matautia, Training Coordinator
‘Ae o a au mea na fai i o, ua mafua ai ….’, ‘ia se’i vaai i ou lavalava na fai, leitioa….’, ‘Ia ua leva le afiafi, sa le tatau ona e i ai i se taimi faapena…’, o faaupuga masani nei ua tele ona tatou tu’ua’i fuaina ai i latou ua sauaina, ma ua pei o le mea fua i a’i tatou le talafo o nei faamatalaga.  O se tulaga matuia tele ma e le tatau ona faia, ma e le fesoasoani foi i ai latou ua a’afia i sauaga.  O le tu’ua’i fuaina oi latou nei, faatusa o lea ua tatou toe faapea atu oi latou e mafua uma ai nei faiga faasolitulafono, lea e toe faataunu’uina ia’i latou lava ia.  E le gata la ina sese o nei faiga, ae e taofia ai foi le toatele o i latou ua sauaina mai le faasoa mai i tulaga o le sauaina oi latou, aemaise ai fo’i, o le a’apa mai mo se fesoasoani. 
 
AISEA!  Aisea tatou te tu’ua’i fuaina ai latou ua sauaina?  Atonu o se isi o mafua’aga o le taumafai o le tagata e faamafanafanaina o ia lava ia e ala lea i le taumamao po o le tutu mamao mai e ua sauaina ma le mea ua tupu, po’o le faapea ua mafua le faafitauli lenei ona ua faia e latou nei ua sauaina ni tulaga nei, ae se manu e le tupu lava se mea faapea ia te ia.  O se iai mafua’aga atonu ia aua nei iai se matafaioi e ono feagai ai ma le ua sauaina, po’o le tu’uai’a le ua sauaina, ma tatou te le tau faamafanafana pe fesoasoani fua i ai.  O le toatele o tatou, e le masani ma e le iloa ona feagai ma ni tulaga faapea, ma o se auala faigofie lea tatou te alo i ai.  O se isi mafua’aga e mafua ai le tu’ua’i fuaina o latou ua sauaina ona o tatou talitonuga ma faavae sese ua tatou ta mau ma masani ai, pei na’o tagata leaga e tutupu ai mea leaga, afai e tupu mai se mea leaga i se tagata o lona uiga o ia o se tagata leaga, ona e leai ni mea leaga e tutupu i tagata amiotonu.  O le faailoga lanu, o ni vaivaiga o se tagata, po o nisi tulaga e eseese ai tagata e mafai ona avea ma tulaga e tu’uaina ai i latou ua sauaina, ae galo atoa ai le solitulafono lea na faatinoina e le tagata solitulafono, ae tu’ua’i atoa mea uma i le e le’i solia le tulafono. 
 
FAATUPULAIAINA!  O nisi o tulaga o lo’o faatupulaia ai le tu’ua’i fuaina o i latou ua sauaina e aofia ai tausuaga i faiga faamalosi, faatupu o tala po’o tala fatu i sauaga ma faiga faamalosi, faailoga eseese o itupa, o tatou talitonuga eseese, o tatou tu ma aga masani, o le tatou faavae aemaise o mea ua a’oa’oina ai tatou a’o tatou tuputupu a’e, o le faalumaina o tamaita’i faita’aga po’o le faiamio, ma nisi faiga se tele o lo’o tatou faia.  O le tatou faapea ifo o le mea lava lea na mana’o i ai, ona o le amio, faiga o laei, ma le ituaga olaga o lo’o soifua ai se isi, o nei talitonuga, po o tala fatu, po o faiga sese, o tulaga uma nei e faatupulaia ai sauaga faafeusuaiga.  O nei foi faiga e faamalosia ai le talitonuga a nisi e faapea, e le aia tutusa tagata uma.
 
FAATAITAIGA!  O nisi o faataitaiga o le tu’ua’i fuaina o i latou ua sauaina i sauaga faafeusuaiga e tele ona faapea, sa le tatau ona faia la ituaiga lavalava, sa tatau lava ona matua’i faaeteete, sa le tatau ona inu ma onâ, sa tatau na taumafai malosi e tete’e atu, o le mea lava na nofo ma fai, o le mea lava na mana’o i ai, ae aisea e le alu ese ai.  E tele foi nisi faaupuga o lo’o fai ma o tatou masani le lafo i le tula’i mai o tulaga faapea, ma e tele ona tatou leiloa o lo’o tatou tu’ua’ia i latou nei i o tatou faaupuga ma faamatalaga. 
FAIGA MASANI!  O nisi nei o faiga masani e sasao fa’aafi ai le tu’ua’i fuaina o isi, o le faapea lea ua alaga tatau ona tu’ua’i fuaina.  I le fia malosi e mafai ona faapea ai nisi e mafua ona e maaleale le loto o le tagata ua sauaina, sa tatau e le ua sauaina ona toe tali atu i le tagata fia malosi, pe tatau foi ona ia alofia le tagata fia malosi.  O le fia malosi o se tulaga ogaoga e mafai ona faatoilaloina ai faalogona o le isi tagata, aemaise o lea toesea ai ona faalogona o le faatauaina o ia lava.  O le fia malosi e na’o ona faatupulaia ai ma puipuia ai uiga o le tagata lea e fia malosi, ae le faasa’oina ai ona uiga po’o faiga fia malosi.  E le tatau ona faamalosia se isi ina ia aua nei auai atu i le aoga, pe aua nei tafao ma uo ona o le mata’u i le fia malosi o se isi.  Ae tatau ona faasa’o ma faasala le e fiamalosi. 
O se isi faiga masani e mafua mai i le faapea ifo e matitiva.  E tu’ua’ia i latou e lima vaivai i le faapea ifo e tatau ona tu’u le paie ae su’e se galuega, po’o le faapea ifo ana tu’u le faia o fualaau faasaina ai po’o ua iai se seleni, a leo lena ua faapea o tagata matitiva e ola faamoemoe i le malo.  O le mea moni, o le to’atele o tagata e faalelava le faasoa, e galulue faasoloatoa ma e tele ona le agava’a i nisi o polokalame a le malo e pei o pepa o mea taumafa, ma tupe maua fua, ma e ui ina galulue i le tele o taimi e le lava lava le tupe maua mo pili ma isi mea fai e mo’omia e le aiga.  O nisi o taimi ma nofoaga, ona o le faailoga lanu e taofia ai le toatele o nisi mai le maua o ni avanoa faigaluega.  O le faaaogaina o fualaau faasaina ma le ava malosi o se tulaga matuia tele, ma i nisi o taimi e le mafai ona foia pe taofia le tagolima i nei mea e aunoa ma se togafitiga faalefoma’i, ma o nei togafitiga e taugata tele.  E ui na faalagolago le to’atele i polokalame a le malo lea e fesoasoani mo nisi o aiga, ae le faapea e faatapula’aina na’o aiga lima vaivai.  O tulaga faaletonu i nisi o galuega ua mafua ai i nisi tagata sa totogi lelei o latou galuega ona faamoemoe foi i polokalame ia a le malo, ma e leai se tu’uaina o i latou ia i tulaga ua iai. 
O sauaga faalotoifale o se faiga masani e tele ona tu’ua’ia ai i latou ua sauaina e ala lea i le fesili pe aisea e saga nofo umi ai lava ma le tagata saua, a le’o lena ua faapea e faatiga mafaufau ma mafua ai ona sauaina, po’o le tele fo’i o le faasuaava o le tagata saua.  Ia tatou malamalama, o tagata saua e tele na faitogafiti ma e tele na latou faafefeina i latou o lo’o latou sauaina ma fefe ai le ua sauaina e alu ese mai lea nofoaga ne’i atili sauaina ai o ia.  O sauaga o le filifiliga lea e faia e le tagata saua, ua ia filifili e fai.  E iai nisi auala e mafai ona fofo ai se mataupu pei o le talanoa ae le o le faao’olima, ae afai ua masani ma e mana’o le tagata saua e faatino sauaga, na te faia lava.  Pe tagofia le ava ma ua ona, e le’o se mafua’aga lea e sauaina ai se isi. 
O faiga faamalosi ma sauaga faafeusuaiga ua fai ma masani le tu’ua’ia faapea ua tele le faatosina i ona lavalava sa fai, ua tele le ava malosi ma ona, po’o le tele o le faifai amio po’o le tautalaititi, pe faapea foi sa tatau ona tautala ma faailoa mai.  E tofu tagata uma ma lona aia ma lona faitalia e na te faia ai so’o sona laei e aulelei ai, ma pe itiiti pe tele vaega o le tino e aliali mai i lea laei, e le’o se mafua’aga lea e faia ai ni sauaga i lea tagata.  O le inu ma le ova o le ona e le’o se solitulafono, ae o le faamalosi o se solitulafono matuia.  Po’o a lava mea na tutupu i se tagata i le taimi ua te’a po’o le tuana’i, e le’o se mafua’aga lea e faia ai ni faiga saua po’o ni faiga faamalosi i se tagata, ma o i latou ua a’afia i  sauaga faafeusuaiga, e tele na faapele, faafefe, tau faamata’u e le tagata saua ina ia aua nei pisa ma faailoa mai le mea ua tupu, aemaise lava pe afai na sauaina e se sui o lona lava aiga, se uo, po’o se tagata e iai se mafutaga va lalata ma le aiga o le ua sauaina. 
FAAIUGA!  O nisi faaiuga e ono tula’i mai ona o le tu’ua’i fuaina o e ua sauaina, e faatapula’aina ma faafaigata ai ona ripotia o sauaga e i latou ua sauaina.  A iloa e le ua sauaina ua tu’ua’i fuaina ia i le mea na tupu, o lea le toe iai ni lagona o le saogalemu ma e ono le mafai ona talanoa pe faasoa mai.  O le tu’ua’i fuaina o i latou ua sauaina e ono faamautinoa ma faasaoina ai faamatalaga a tagata saua ia e tele na fai faapea o le faapogai o mea uma o le tamaita’i lea, po’o le tagata lea ua ia sauaina, ma e le’o se sese po’o se matafaioi a le ua sauaina, le taumafai ina ia foia se faafitauli aemaise mo le e faia sauaga.  O le tatou auai i faiga ma uiga nei o le tu’ua’i fuaina o i latou ua sauaina, o le tatou faatagaina lea o le tagata saua e faia pea lana amio lea ma faiga faamalosi ma alofia ai le faasa’oina o ana gaioiga faasolitulafono o lo’o faia.    
A’AFIAGA!  A talitonu se tasi o lo’o tu’ua’i fuaina ia pea faailoa mai sauaga, atonu o le a le ripotia maia lea tulaga.  E mafai ona lagona ai le tu toatasi na’o ia o le ua sauaina, ona e tele ona le amanaiaina mataupu faapenei pe faatalanoaina faalaua’itele.  A iai se mea e le ripotia, e itiiti pe leai foi se avanoa e ono faia ai ni suiga. O se isi a’afiaga e ono tula’i mai, a le faasalaina tagata e faia sauaga e tusa ai ma aga soligatulafono, e faaauauina pea nei faiga saua.  A tupu loa tulaga faapea, o lea fai ma masani le saua aemaise o faiga faamalosi, ma o’o atu ai i se tulaga o lea fai ai mea ula pe ulagia fo’i.  A tu’ua’i fuaina se tagata ua sauaina, e le’o faamalosia le tagata saua e tu’u le saua, ma e avea lea ma mea e faaauau ai pea seia avea ma faiga masani. 
A’AFIAGA FAALUA!  O le faamalosi, e pau lea o le solitulafono e taumafai ai le ua sauaina i sauaga faafeusuaiga ina ia faamaonia lona mama.   O le tu’ua’i fuaina o le ua sauaina, e mafai ona a’afia ai i le tulaga o le a’afiaga faalua.  O le a’afiaga faalua o le toe tu’ua’i fuaina lea o le ua sauaina e latou ia e galulue mo le auaunaga po’o le fesoasoani fo’i ia’i latou ua sauaina.  O amioga nei e faaosofia ai lagona faanoanoa ma le mafatia o le ua sauaina, ao lea e toe faia lava e tagata nei o le latou matafaioi po’o le latou galuega le fesoasoani i tagata ua sauaina. 
 
TAOFIA!  E tele ni auala, peitai o nisi nei o auala e mafai ona tatou fesoasoani e taofia ai nei faiga o le tu’ua’i fuaina o i latou ua sauaina.  E mafai ona tatou lagolagoina i latou e ala i le tatou faamautinoa ma faailoa atu i e ua sauaina e le’o ia e sese, ma o sauaga o se filifiliga lea a le tagata saua, ma ua na’o ia e sese i taimi uma e faia ai sauaga.  Ia tatou iloa e sili atu ona malamalama le ua sauaina i le tulaga o lo’o tupu ia te ia, ae tatau ona tatou lagolagoina o ia.  Ia tatou faalogo lelei i tagata pea talanoa mai e faatatau i sauaga ma tatou ofoina atu se fesoasoani pe saili foi se fesoasoani mo i latou ma ia tatou taumafai tatou te faatasi ma le ua sauaina a’o feagai ai ma mafatiaga.  Ia alofia le tu’ua’i fuaina o i latou ua sauaina i faasalalauga eseese, ma taumafai ina ia suia o tatou upu ma faamatalaga, suia nei le fesili o le ‘aisea e saga nofo umi ai pea ma le tagata saua?’ i le ‘aisea e faasaua ai lea tagata’.  Ia suia tatou faamatalaga ma le tatou gagana. 
O se isi vaega tele e mafai ona tatou fesoasoani ai i le taofia o le tu’ua’i fuaina o i latou ua sauaina, o le tu’ua’ia lea o i latou o lo’o solitulafono e ala i le tatou faasa’o o faamatalaga pea tatou faalogo i ai, lea e tu’ua’i fuaina ai latou ua sauaina, ae le na’o le tu’u ai pea e faia nei faamatalaga sese.  Ia faamasani ona tatou tautatala e tete’e atu i faamatalaga e tu’ua’i fuaina ai se tagata ua sauaina.  Aua ne’i talitonuina faamatalaga a le tagata saua i le mafua’aga e ala ai ona faasaua, aua ne’i taumafai fo’i e tauamiotonuina ana taga, ae ia tu’ua’ia le faasaua i ana soligatulafono; aua nei tu’uina iai se avanoa e faia ai ni alofaga e tu’ua’ia ai le ua ia sauaina , pe tu’ua’i i le ava po’o fualaau faasaina, ia tu’ua’ia lava le faasaua ae leo le na te sauaina. 
I se aotelega o lenei mataupu o le tu’ua’i fuaina o i latou ua sauaina, e tulai mai i tulaga eseese ma atonu o se auala e faigofie mo nisi ua sauaina nisi, peita’i e le’o le tali sa’o ma le moni lea. E leai lava se taimi e sese ai pe tu’ua’ina ai le ua sauaina ma e le tatau foi ona faia pei se tagata solitulafono.  O le iai o le tatou malamalama ma le silafia i le tulaga lenei ma pe aisea ua ta’atele ai, aemaise o le a’afiaga o i latou ua sauaina, e mafai ai ona tatou puipuia ma taofia lea tulaga mai le faatupulaia aemaise o le faaauauina.  A sasa le tamaititi ona faapea lea o le matua, e mafua ona sasa ona o le faalogo gata ma fai se aoaiga, ae a faamalosi se tama’ita’i o lea se tala e fai e agatonuina ai lea faiga?  Ua lavea Foaga e lei fai misa, ua sauaina e aunoa ma se alaga tatau, ma e leai lava se alaga tatau!  Taofi loa sauaga faafeusuaiga, taofi le tu’ua’i fuaina oi latou ua sauaina.