SE TAIMI E MALOLO, MANATUA, MA FAAMANATU MANUIA!

Tusia: Judy Mata'utia , Training Coordinator

O le faaiuga o lenei tausaga o galuega faatino faapea ma polokalame fai, e mafai ona avea foi ma taimi e toma tasi ai, toe tomanatunatu i galuega fai, mai I lenei tausaga atoa, aemaise o le faamanatuina o le mafai ona faataunuuina o nei galuega ma ni manuia foi na tula’i mai ai.  O le 2022 sa feagai ai Le Mau ma le tele o suiga i galuega faatino ona o le a’afia ai o le atunuu I le Koviti-19, faapea foi ma faafitauli eseese ua faatupulaia I totonu o tatou siosiomaga, o le si’i o le tau o le soifuaga, toatele ua le faigaluega, ma le tele o nisi faafitauli ua tula’i mai I tua mai o le faama’i.  Peita’i e ese ma le maufetu’una’i ma le sogasoga o tatou tagata, e fai o le feagai ai ma le koviti ae fai foi o le taumafai ina ia ta’ita’iina I tatou lava ia I faiga masani fou I tua mai o le faama’i.    
 
O otootoga  nei o nisi o galuega e ese mai I galuega ma faatalanoaga masani sa mafai ona faataunuuina; 

• Avanoa saogalemu:  Na mafai ona fausia ni avanoa saogalemu sa faatalanoa, faasoa, ma faailoa mai ai le mamalu o le atunuu o latou manatu ma mafaufauga e faatatau i sauaga ma faafitauli eseese I le tatou lotoifale.  O nei avanoa saogalemu sa mafai ona faataunuuina I nofoaga eseese ma luga o le upega tafailagi ma na tele se faasoa ma fesili sa mafai ona faatalanoaina mai sui eseese sa auai i nei faatalanoaga. 
• Faiga paaga:  Sa maua le avanoa faaauro e fai paaga ai ma ni tele o faalapotopotoga, tautua, ma auaunaga eseese.  Oi latou nei o lo’o latou tautuaina foi le atunuu e ala I auaunaga faapitoa, ma sa mafai ona galulue so’oso’o tauau ma fesoasoani le isi I le isi I le faamalosia o galuega ma polokalame fai mo vaega eseese o le teritori.  O lo o faaauauina pea nei faiga paaga mo nisi o galuega mo le tausaga fou.
• Siufofoga o le tupulaga talavou:  O le mataupu I sauaga I faiga uo a tupulaga talavou sa mafai ona auai mai nisi o sui o le atunuu latou te ta’ita’iina lea faatalanoaga mo aso e 2, ma faasoa ai I le faateleina o le malamalama I galuega a latou o lo’o galulue faatasi ma tupulaga Samoa, faapea ma le a’afiaga o tupulaga Samoa I le va tapuia.  I se isi koneferenisi sa ta’ita’iina e fanau sa galulue I le polokalame a Le Mau mo le vaitau mafanafana, sa faasoa mai ai sui I le fesoasoani o lo o manaomia e aiga e mafai ai ona feagai ma faiga masani fou, o le a’afiaga o faafafine I sauaga faalotoifale, taua o le soifua manuia ma le soifua maloloina faale-mafaufau mo tama’ita’i talavou ua avea ma tina, ma a’afiaga o talavou I nei aso I le faaaogaina o fualaau faasaina.  O le autu o nei faatalanoaga uma o le mafai ona fausia o avanoa mo se leo o le tupulaga talavou e faailoa ma faasoa mai ai I o latou manatu.
• Soifua maloloina faale-mafaufau:  E taua tele le tatou soifua maloloina faale-mafaufau, ma na mafai ona avea Le Mau ma se vaega tele o lea itu.  I nisi o faiga paaga sa mafai ona ta’ita’iina ai e nisi o I latou o lo’o galulue faakonekarate I Le Mau le faatalanoaga po’o le koneferenisi e faia I tausaga ta’itasi mo le soifua maloloina faale-mafaufau.  Sa mafai ona faasoa ai I le a’afiaga o uo ma aiga o I latou ua pule io latou soifua, o lamatiaga o le tupulaga talavou pe a leai ni punaoa e mafai ona fesoasoani mo I latou, o su’esu’ega ma saili’iliga e faatatau I le sogasoga o le tupulaga talavou I Amerika Samoa, ma nisi lava mataupu taua e faatatau I le soifua maloloina faale-mafaufau o le tupulaga talavou.  Sa toatele nisi o le fanau talavou na vaaia le tiotio ma le naunau e fia avea ma faufautua I le lumana’i e tautuaina I latou e feagai ma mafatiaga.
• Faamanatu mo fanau, aiga ma ekalesia:  Sa valaauliaina Le Mau e le matagaluega a aoga, ina ia ta’ita’iina ni faatalanoaga e faatatau I le fiamalosi.  O nei faatalanoaga sa mafai ona faamaopoopoina e faifeau mai nisi o alalafaga ma sa faia mo vaiaso e 5.  Sa auai le toatele o ekalesia, e amata mai lava I le fanau iti e oo atu I tagata matutua o aulotu.  E ui I le tele o manatu ma faasoa na mafai ona faaalia, peita’i o se tulaga pito sili ona vaaia mai nei faatalanoaga, o le mafai e le fanau ona tula’i mai e faasoa I luma o tagata matutua po o latou matua foi.  E I ai le talitonuga o nei faatalanoaga ma aoaoga ua na’o ni faamanatu ma toe fafagu le mafaufau o le tagata I mea ua na iloa, ma sa amatalia faatalanoaga I le faasoa ma faailoa mai e le aofia ia uiga ma foliga o le fiamalosi.  E moni lava le upu ‘e leai se mea e fou I lalo o le la’.
• Galuega faaatisi mo le soifua manuia:  O se talitonuga tele a Le Mau le faataua o le tatou soifua manuia I le tatou olaga faale-aso ma na mafai ona faatinoina ai nisi o vasega mo le faia o galuega faaatisi e fesoasoani ai I le mafai ona fausia ma faatumauina o le soifua manuia o le tagata.  I nei vasega faaatisi sa faata’ita’i ai le tusi ma le valiga o ata sa ta’ita’iina e le tama’ita’i faaatisi lauiloa I Amerika Samoa o Puatauofo Tofaeono.  O le isi vasega faaatisi sa mafai ona a’oa’oina ai e Tasiaeafe Hiner le mafai ona faaaogaina o musika e fesoasoani ai I le faaleleia atili o lou soifua manuia.  E tele nisi ituaiga galuega faaatisi e mafai ona faia e fafau ai le soifua manuia mo tagata taitasi, ma o le toatele o tatou tagata Samoa e I ai le latou tomai ma le taleni faaatisi. 
• Potopoto Samoa:   Se isi tulaga maoae o le taumafaiga a Le Mau I lenei tausaga, o le mafai ona faapotopotoina le tele o tagata Samoa I atunuu I fafo e faatasi mai mo se latou faasoa ma faailoa mai tulaga foi o galuega ma auaunaga o lo o latou tautuaina ai nisi foi o aiga ma tagatanuu o Samoa I atunuu o lo o latou aumau ai.  E lagona foi le mafanafana ona o lo o iai nisi o latou o lo o latou ofoina atu le latou tautua ma le fesoasoani mo tatou lava tagata aemaise o le feagai ai ma taimi faigata. 

 
Ou te manatuaina le tele o faalagona eseese e o’o mai pea mae’a ona faatinoina galuega ta’itasi, ma ou faai’uina I le faapea atu I le ‘soifua’.  E maua lagona o le tino vaivai ua maea se galuega, o lagona o le fiafia ina ua faai’uina ma le manuia se polokalame, o lagona o le faafetai I le mafai ona auai mai o nisi pe faafofoga ma maimoa mai foi I le leitio, TV, upega tafailagi ma nisi lava auala, o lagona o le faafetai mo I latou sa mafai ona galulue faatasi ina ia mama ai se avega, o lagona o le talitonuina o le aufaigaluega I le mafai ona faatino nei galuega, o lagona o le faamalosiau mai mo le faaauauina pea o nei galuega, o lagona o le le fiu gofie ona o lo o tulai mai pea le tele o faafitauli I o tatou lofoifale, o lagona o le le fefe ona o le lagolagoina e le faatonu sili ma le laulau fono a Le Mau o nei galuega fai, aemaise o le lagona matamuli ona o ai ea I matou ua outou manatu mai ai e ala I le tou faatagaina o matou I totonu o tou maota ma laoa e ui atu I ala leo eseese I luga o le leitio, o polokalame faatalanoa eseese I luga o le televise, faapena ma vaega eseese I luga o le upega tafailagi ua mafai ona outou silasila mai ai I le avatu o se feau.  O nei lagona uma e taua ma e tatau ona faamanatuina ona o le malosi ma le tautiga.  Afai foi ua iai se matou upu I lenei tausaga ua sala po ua pao papa I sa outou faafofoga, ia toe faafoi mai so matou leo vaivai, ae matou te matua atu pea iina.  O le talitonuga lava a lou Mau, ia pau se fatu, ola ma fua se fatu, ma le logo a Masefau ia lagona pea lona pao.  Ia manu teleina aso fiafia o lo o tatou alo atu iai ma saga faamanuiaina pea Amerika Samoa i se tausaga fou fiafia ma le saogalemu.  Soifua!
​