SAUAINA O TAGATA MATUTUA:(O LE TU’ULAFOA’I MA LE FAATAMALA MA LE ITU FAALEAGANU’U)

Tusia:  Judy Mata’utia
 
O tagata matutua i nei ona po ua sili atu ona vaaia tele i mea fai, sili atu le malolosi ma sili atu le tuto’atasi nai lo se isi lava taimi muamua.  Ua umi ona soifua ma ua sili atu le soifua maloloina fo’i.  Ae a’o tuputupu a’e le faitau aofa’i o tagata matutua, e faapea fo’i le faafitauli natia o le sauaina o tagata matutua, faaaogaina ma le tu’ulafoa’i.
O lo’o matua lamatia lava le tulaga lelei o le olaga o tagata matutua o lo’o a’afia i sauaga,  ona e masani ona latou o’o i le tulaga faaletonu o le gaioi, o mea tau tupe, ma faatupulaia ai le ola faalagolago i isi tagata, faaletonu le soifua maloloina, lagonaina le leai o se fesoasoani aemaise foi le tu’ulafoa’i ma le faateleina fo’i o mafatiaga faale-mafaufau.  I nisi o suesuega e taua ai o tagata matutua ua sauaina e tele ona maliliu muamua nai lo i latou e le’o sauaina, tusa lava pe leai ni ma’i masani na iai pe lamatia ai fo’i le soifua, ma e le tasi se ituaiga sauaga e sauaina ai tagata matutua. 
Ae o le a la le uiga o le faatamala ma le tu’ulafoa’iina o tagata matutua?  O ia faiga e aofia ai faiga le talafeagai aemaise lava i le tausiga o tagata matutua, po’o le le mafai e le o lo’o avea ma ona matafaioi le tausiga o tagata matutua, ona faataunuuina manaoga o tagata matutua, pei o le musu po’o le le mana’o e avatu se meaai, vai, faia lelei laei, faanofo i se nofoaga lelei, faataele ma tumama, tausia inumaga o fualaau o lo’o faatonuina mai e le foma’i, malu puipuia ma saogalemu, ma nisi lava tulaga taua e manaomia e le tagata matua, lea ua malilie ai e faataunuuina e le e tausia tagata matutua.   O le tu’ulafoa’i fo’i e mafai ona tula’i mai pe a le lelei ona puipuia le tagata matua mai tulaga e ono manu’a ai, pe lamatia ai lona soifua ma o’o atu ai i ni manuaga ogaoga pe matuia.  I tulaga faapea, e le mafai ai ona taua o se faalavelave faafuase’i, ae o se mea ua tupu e mafua mai ona o le faatamala po o le leai o se manatu tele i le soifua manuia o le tagata matua.  O le tuulafoa’i ma le faatamala e ogaoga ma matuia nei faiga e pei lava o nisi ituaiga sauaga. 
O tagata Samoa o ni tagata e olaola faatasi, e maua ai le soifua faalauaitele, o le matafaioi a le isi le vaaia o le isi, ma tatou te tauave faatasi lea matafaioi, o tatou aiga, manuia lautele o le nuu ma afioaga faapea ma le atunuu.  E le o tele se talanoa e faatatau i tagata matutua i totonu o tatou nuu ma afioaga faapea fo’i ma o tatou tagata, aemaise o le tatou aganuu.  Le aganuu lava lea e tasi lea e faapea o tagata matutua o penina tautele ma oa, ma o le tausiga o latou o le auala lea o tatou manuia.  I le tumutumuga o le tatou faaSamoa e laualuga ai le faaaloalo, mai lava le tatou laiti, tatou te tuputupu ifo ua tatou iloa le taua o le faaaloalo i so’o se tagata e matua atu ia tatou, aemaise o tatou matua lea o lo’o tausia ma a’oa’oina i tatou, aemaise o le anoanoa’i o le latou faitaulaga mo i latou.  O le faaaloalo foi lea e auala ma feso’ota’i i ai le tautua.  I le tele o tatou tagata Samoa ma o tatou aiga, e i ai le faavae lea e tautuaina e fanau o latou matua, i le olaga atoa, ma e fou nei lava, e le’i faapea i le tuana’i, le ave o tatou matua e tausi e nisi tagata i nofoaga e tausia ai tagata matutua.  I tu ma aga a Samoa, e tausi toatele e le aiga lautele le tagata matua e aunoa ma se fesoasoani mai fafo atu o le aiga, ma e tausi lava i lima o tagata o aiga o latou matua.  Peita’i o na faiga atonu ua sui i nei ona po aemaise lava i totonu o tatou aiga.  Atonu o nei faiga masani ua faafaigata ona galulue nisi i galuega, malaga i atunu’u i fafo mo a’oa’oga, ma tausia matua i le taimi e tasi.  O nisi o matua ua nonofo lava mo le toega o le latou soifua ma se tasi o latou alo e tausia i latou, ma e masani ona faia e se teine matua o le fanau, ae fesoasoani uma isi o le fanau i tulaga tau seleni mo le tausiga o latou matua.  O le talitonu faapea afai e avea oe ma se tagata alofa ma e te tausia lelei ou matua, a avea fo’i oe ma matua, ma ulu o lou aiga, e faamanuiaina foi oe i le tautua a lau fanau.  I nisi o suesuega o le tausia o aiga o latou lava matua, o se faiga sili lea mo tagata Pasefika, peita’i e iai fo’i ona lu’itau.  O lea e tele ona sauaina tagata matutua e latou lava fanau po’o nisi foi i totonu o le aiga, e faigata fo’i la ona o’o atu se lavea’i mo nei matua pe afai o lo’o tausia i totonu o aiga, ma le mafai ona o’o atu tausiga po’o auaunaga mai fafo atu o le aiga lava ia, ma faaauau ai lava le sauaina o matua.  Saunoa le susuga i le faifeau ia Rev. Dr. Smith mai Niu Sila i se tasi o faatalanoaga na ia faapea ai, ‘o lo’o malolosi pea so’otaga i aiga Pasefika, ae o nisi o taimi, o so’otaga malolosi nei e mautinoa ai o lo’o tausia lelei tagata matutua, ua malepelepe ma talepeina, o lona uiga atonu e manaomia fo’i le tausia ese o tagata matutua mai aiga.’ 
I totonu o aiga Samoa o le matafaioi a tagata matutua le tuuina atu, a’oa’o atu, faasoa atu, ma faailoa atu le aganuu i le isi augatupulaga o lo’o fai mai.  O tu ma aga faale-aganuu, o talitonuga, ma faiga e pei o le ava fatafata, le mamana o mafutaga faale-tagata, felagolagoma’i ma lagolagoina o aiga, so’otaga i laufanua ma eleele, le faasinomaga e faavae i le faale-agaga, ma tala faasolopito, e a’oa’oina uma mai i a’ao o tagata matutua.  I Samoa ma isi atunu’u o le Pasefika, e le so’ona tautala se tagata.  E tatau ona tatou faalogo ma tu’u atu muamua le avanoa mo isi e saunoa muamua ai.  O se isi lea tulaga e tatau ona faia i le tausiga o tagata matutua, e so’o se tagata o lo’o ia faia le tiute o le tausiga po’o le vaavaaia o tagata matutua.  Ia tumau pea le faatauaina o latou manatu ma mafaufauga.  E tatau ona tatou faaalia le taua o nei tulaga, aemaise o le faaaogaina. 
 O le faatumauina o le soifua manuia o matua e taua tele lea i le itu o le faamautinoaina o le soifua manuia o latou aiga, nuu ma afioaga, aemaise i auga tupulaga uma.  O le mea moni lava latou, e le faigata ona faapupulaina.  A manuia matua, e manuia uma fo’i mea faia i totonu o se aiga, e vaaia fo’i le tula’i mai o aiga malolosi, o aiga e nuti mea faatasi.  E faapea fo’i lona itu faafeagai, a faaletonu matua, le tausiga o matua, e faaletonu uma atu ai lava ma mea fai o lena aiga.  So’o se tagata matua lava o lo’o sauaina i totonu o lona aiga, e le’o atoatoa fo’i se malosi o lena aiga, e leai fo’i se galulue faatasi i le tausiga o le matua.  A manuia tagata matutua o se nu’u, e manuia uma fo’i le nu’u.  A manuia o tatou matua, e sologa lelei uma fo’i mea uma i totonu o aiga.  E tatau ona amata mai totonu o tatou aiga le taofia o le sauaina o tagata matutua.