Sauaga Faalotoifale (Domestic Violence) Mafaufauga mai le itu tau le soifua maloloina (Thoughts from the health standpoint)

Written by Dr. Victor T. Williams Tofaeono, M.D.
E muamua ona fesili, pe o le a le uiga o lenei mataupu o Sauaga Faalotoifale.  E mafai ona faapea le tali: “I se ulugalii, o le taumafai lea o se tasi e pulea  le ola o lona to’alua.”  O tane e tele ona faia lea tulaga I o latou taitoalua.  O ia sauaga e a’afia ai le fa’ao’olima, o faiga faamalosi I tama’ita’I po’o alii, o le tau faamata’u, o le faifai i faamatalaga ina ia tu’ualalo ai faalagona, faamaasiasiina, ma le tu’uaia faapea ua leaga ai aiga.  E tele mafutaga I vaega eseese o le lotoifale o Samoa ua a’afia I sauaga nei.  O lo’o tutupu sauaga nei I so’o se aiga, e aofia ai aiga e faaletonu le tamaoaiga ma le lima vaivai e o’o atu lava i aiga mautu ma le tagolima o le atunu’u.
O lenei tusitusiga o se taumafaiga e fesoasoani I alii ma tama’ita’I fomai  ao feagai ma su’esu’ega ma togafitia o I latou ua sauaina e o latou toalua po’o uo I sauaga faalotoifale.   Afai e masalomia se tamaitai o loo mafatia I sauaga,  e tatau ona fesili I fesili nei e iloa ai o loo sauaina ia.
  O fesili nei: 
1.      E faapea mai lau paaga o le a fasia oe po o nisi e te alofa iai?
2.      E fasia oe e lau paaga, kiki, tu’I, pe titina?
3.      E tu’ua’ia oe e lau paaga I mea sese uma e tutupu I le lua va?
4.      E faamaina oe I luma o isi tagata?
5.      E iai sau pule I tupe o le lua aiga?
6.      E iai sou leo I tonu uma o le lua aiga?
7.      E pulea e lau paaga lou taimi ma au mea e fai?
8.      E faaleagaina e lau paaga au mea totino?
9.     E faamalosia oe e fai faiga faafeusuaiga e te leo malie ai?
O le tali ioe I se tasi o ia fesili ua faailoa mai ai lona aafia I sauaga faalotoifale.   E faailoa ai fo’I I alii ma tamaitai tausi mai le mana’omia o le latou fesoasoani. 
E taua le iloa e alii ma tama’ita’I fomai, o faailoga vaaia o tagata o lo’o aafia I sauaga faalotoifale.   O le vave ona ripotia ma avatu le fesoasoani I ia tagata, o le vave fo’I lea ona mapu mai I tiga o le tino ma le mafaufau e tupuga mai I sauaga.  O le tele o I latou ua aafia I nei sauaga e le mana’o e iloa e nisi o lo o feagai ma mafatia I latou I sauaga.  O nisi mafuaaga o le maasiasi ina ne’I iloa e tua’oi, aiga, nuu; fefe nei faateleina sauaga pe a ta’u atu I nisi  mea o lo o  tutupu I lona aiga; vaai alofa I lana fanau e le fia motusia ma faataapeapeina lona aiga; musu fo’I ne’I ave e le tamaloa mea tau tupe ma mea tau le aiga pe a tete’a I la’ua.  
O faailoga vaaia nei e iloa ai I latou o loo aafia e tasi I sauaga lotoifale, e aunoa ma le faailoa mai.
 1.  O manuaga I le pa’u soo, maosiosia lima ma vae, po o le gau o ivi o lima ma vae
2. Tiga o le manava (vague abdominal pain)  
​3. Ua  tago tele I le ava malosi (heavy drinking of alcohol)
4. Tele le popole (depression and worry)
5.  Ua musu e alu e vaai le foma’I  pe a ma’I pe lavea
6   O le mumu ma totolia o mata (red and bloodshot eyes)
7   O le manu’a o lima e mafua I le taliina o se ta o ia I se laau po’o se naifi (defensive wounds)
8. Le moe lelei I le po (lack of sleep)
9. Tuai ona alu e togafitia faama’I e mafua mai I faiga faafeusuaiga (late treatment of sexually transmitted disease).
10. Mu o lima ma vae ma isi vaega o le tino (multiple burns)
E le faigofie le galuega a alii ma tamaitai fomai I le su’esu’eina ma togafitia o I latou ua a’afia I sauaga faalotoifale.  E tatau ona faia su’esu’ega e aunoa ma le faaalia o ni uiga pei o le ata aamu pe tauemu I le ua su’esu’eina.  E tatau ona faalogo I mea uma e ta’u mai ma amana’ia tala uma a le ua su’esu’eina.  Aua le faamasino atu ae fai su’esu’ega ma le alofa ma le faamaoni. Ia su’e mae’a le tino ole fafine ina ia maua ma togafitia uma ni manu’a o nana.  Taumafai e saili mea o loo mamafa I le mafaufau ma fuafuaga mo le lumana’I;  ia faamaonia mea leaga uma ua tupu aemaise lava manu’a o le tino ma le mafaufau.  E tatau ona faailoa tulaga e fesoasoani ai i e ua mafatia I nei sauaga, e iai ofisa ma auaunaga eseese o le malo o Amerika Samoa ma faalapotopotoga tumaoti, ma numera o a latou telefoni e mafai ona valaau iai mo se fesoasoani. 
E tatau fo’I ona maua se fesoasoani mo alii po o latou o lo o faia sauaga, ia latou malamalama I le tulafono e molia mo le faia o sauaga lotoifale.  E tatau fo’I ma mana’omia e I latou fautuaga faalemafaufau (psychological counseling) ina ia mafai ona fo’ia o amio o le fasi ava.  E tatau ona faatalanoaina ma sailiili I le pogai lea e mafua ai ona faasaua I tamaitai.  E maua fo’I se fesoasoani pe a talanoa ma foma’I o le mafaufau (psychologist and social workers) aemaise lana faife’au. 
E taua tele le puipuia o tina ma tamaitai faapea ma fanau mo le lumana’I.  E taua le faatalanoa e ulugalii ma aiga o faiga e aloe se mai ai I mafatiaga faaleaiga.   Afai o tupe e mafua ai ona vevesi, e tatau ona taumafai ina ia manino le faaaogaina o tupe a le aiga ma ia le aia tutusa I mea tau seleni.  Afai o le tele o faalavelave, e tatau ona taumafai e fai na o faalavelave e mafai ona fai ae aua le faia le tulaga e tigaina mulimuli ai.  Atonu o nisi nei o mafuaaga e tulai mai ai vevesi I totonu o aiga.  E lelei le malamalama I ia tulaga uma ina ia taumafai e galulue faatasi ile suiga e maua ai le fealofani.
O nai manatu ia e fia fesoasoani atu ai I alii ma tama’ita’I fomai I le galuega faigata o feagai ma I latou ona o le faasauaina o tina ma tamaitai e o latou taitoalua.  Ia manuia outou uma aemaise I latou ua faasauaina I totonu o lotoifale o le atunuu.