O TALITONUGA I LE ALAGA TATAU ONA SAUAINA E SE TANE O LANA AVA

Retrieved from: https://matafilms.co.nz/video/tag/samoan+wedding

Written by:  Judy Matau'tia, ASADSV Training Coordinator
Ua faaalia se tele o le numera oi latou ua aafia I sauaga, e toe tuuaia e latou lava latou I le mafuaaga o sauaga e tutupu ia latou. Ua latou talia sauaga ‘o se vaega masani o le olaga faitoalua’, le taua I le fomai le mafuaaga na mafua ai ona faamanualia le tino, musu e saili se fesoasoani pea sauaina ona o le maasiasi po’o le sailia foi o se fesoasoani mai nao Se sui o le aiga ae leo auaunaga faapitoa mai ofisa ma faalapotopotoga e maua ai auaunaga. Mai nisi sailiiliga o lo o taua mai e nisi ua sauaina le mafuaaga autu e mafua ai ona sauaina faaletino I latou e o latou paaga, ma e mafua mai I faafitauli faaleaiga ma le latou le usitai. O nisi e faapea mai e mafua ona o le faasuaava o le e faia sauaga, ma nisi na fai mai, e leai se mafuaaga faapitoa mo le sauaina. E tele ona leai nisi e faapea mai e mafua sauaga ona o le le mafai ona pulea ma taofiofia o le ita. E foliga mai e faapea le tele o I latou ua sauaina, e iai se alaga tatau o le sauaina oi latou, ma ona a’afiaga, lea ua fai alofaga ai mo sauaga ia e faia e o latou paaga. E manino lava afai e talitonu alii o manatu ma mafaufauga o tamaitai o sauaga o se vaega masani o le olaga faaipoipo, pe e lagona foi e alii le tauamiotonuina o latou I le sauaina o latou paaga I nisi o taimi ona e talitonu tamaitai o le mea e tatau, ona faatupulaia ai lava lea o le saua o alii.
Ua fefaasoa’ai manatu ma lagona o tamaitai I le iai o le mafuaaga tatau I alii e sauaina ai o latou ava. E aofia ai pea le lelei ona faia o galuega o le vaaiga lelei o le fale ma le aiga, pe a le usitai le ava I lana tane, pe a fesiligia e le ava lana tane e faatatau I uo teine a lana tane, pe a masalomia e le tane e le o faamaoni lana ava, ma afai e le o faamaoni le ava. O le faaaogaina o sauaga e faatonutonu pe pulea ai tu, aga, ma uiga o le ava i nisi o taimi, atonu e fetaui ma talafeagai I le vaaiga ma le talitonuga a nisi, ona e iai le latou manatu, ua alaga tatau ma talafeagai. O le mea moni, o le iai pea o nei ituaiga uiga ma mafaufauga, e faatupulaia ai pea le lagolagoina tele o sauaga o paaga. E le faaitiitia e alii ona faia sauaga pe a latou iloa e iai nisi o tamaitai e talitonu e iai mafuaaga talafeagai e sauaina ai latou. O le musu o se tamaitai e faia faiga faafeusuaiga, o se isi lea mafuaaga ua faapea ai nisi ua talafeagai ai le fasi ma le faaoolima o lona toalua I ai. I se aotelega, e toatele naua’i tamaitai Samoa e faapea o le fasi ma le faaoolima i ai latou, e agatonuina ma e talafeagai, ae 62% o tamaitai Samoa ua feagai ma sauaga faaletino mai se tasi e le’o fai ma paaga, ma 23% o tamaitai Samoa na faataunuuina iai sauaga a’o maua I le ma’I taga.
E tele atu le numera o tamaitai nai lo o alii e faapea e talafeagai le sauaina o latou e alii I nisi o taimi. O nisi o alii o le mafuaaga tele lava e sauaina ai tamaitai, ona o le le faaaloalo I le aiga o lana tane. O nisi e faapea e alaga tatau le sauaina faaletino pe afai ua le faamaoni le ava I le la mafutaga. O nisi mafuaaga e faapea mai ai nisi o alii e tatau ma onomea le sauaina o latou taitoalua, ona o le le usitai I ai latou po’o le tuulafoai o fanau. I se vaaiga faatusatusa I talitonuga ma manatu o le lautele, o lo o manino mai ai o lo o faapea le toatele e iai lava mafuaaga tatau o sauaga. O le mea moni lava, e leai lava ma se mafuaaga po o se alaga tatau lava e tasi e tatau ona sauaina ai se tagata se isi lava tagata, ma o lo o iai tulafono e puipuia ai tatou mai le faaoolima mai o se isi. O sauaga foi e le o se mea e tatau ona fai ma masani, afai sa masani ai, ua tatau nei ona tuua ma taofia ia faiga faasaua. E iai aafiaga o sauaga tatou te le vaaia I le taimi nei po o le taimi e faia ai sauaga, atonu tatou te vaaia manua faaletino, ae tatou te le iloa atu manuaga faalelagona lea e mafai ona aafia ai le tagata I se taimi mamao I luga I lona olaga tuputupu ifo aemaise foi o alo ma fanau pe a latou molimauina sauaga I le va o matua. O le valevale alofa ma le puipuiga o se taulealea o sona tuafafine o se mea taua lea I le olaga o se alii Samoa. Afai o le talitonuga atoa a le taulealea Samoa lona puipuia o lona tuafafine, pe le ono tatau foi la ona puipuia e alii ma tane o latou ava ma taitoalua? Pe le o le ioi mata ea o le tama lona tuafafine?