|
5/5/2022 O LE TOE MAUA O LE SOIFUA MALOLOINA FAALE-MAFAUFAUE A’AFIA AI FUAFUAGA FAATINO MO LE TOE MAUA O LE SOIFUA MANUIARead Now Tusia: Judy Mata’utia
O le masina o Me i tausaga ta’itasi ua atofaina o se masina e faatupulaia ai le malamalama ma le silafia, faia o faatalanoaga, aemaise o le faatauaina o le tatou soifua maloloina faale-mafaufau. I tausaga ta’itasi e silia ma le miliona tagata i le lalolagi atoa e feagai ma ma’i o le mafaufau. I tausaga ta’itasi o lo’o feagai pea le toatele ma le faamaasiasiina ma le faalumaina ona o ma’i o le mafaufau, ma i tausaga ta’itasi e tatau ona tatou a’oa’oina le lautele, ma lagolagoina tulafono ma aiaiga mo se manuia o i latou nei ua a’afia i ma’i o le mafaufau, aemaise foi o le lagolagoina o latou aiga. I se su’esu’ega na faatinoina i le 2018 e le Matagaluega o Tautua ma Alagamanuia mo Tagata Lautele, a le malo o Amerika Samoa, na mafai ona maua ai nisi o faamaumauga e faatatau i le tulaga o le soifua faale-mafaufau o lo’o i ai o tatou tagata i Amerika Samoa. Mai lea suesuega na maua ai e 91% o tagata matutua e tetee atu i se manatu po’o ni talitonuga faapea a iai se sui o se aiga ua a’afia i tulaga faaletonu o le soifua maloloina faale-mafaufau, o se mataga po’o se luma lea i se aiga. 91% o tagata matutua e le auai i se manatu faapea o le a le mafai ona taua ma faailoa atu e se isi o ia ua iai ni faafitauli tau le soifua faale-mafaufau ona e ma tele. 74% o tagata matutua e le auai I le manatu faapea o I latou ua aafia I faafitauli tau le soifua maloloina faale-mafaufau o ni tagata e faatupulaia sauaga. Peitai e 10% o tagata matutua e auai i le manatu e faatupulaia sauaga e i latou ua iai faaletonu faale-mafaufau. O se tasi o talitonuga ma vaaiga o lo o ta'a I tagata Samoa, e taua loa e se isi le soifua maloloina faale-mafaufau, vave lava ona faapea ‘e le leaga so’u ulu’. E iai le manatu a tatou talanoa I le tulaga o tatou mafaufau, ona faapea lea o tatou ua le atoatoa tatou mafaufau, pe ua faaletonu o tatou mafaufau. Ae leai!! O le tatou soifua maloloina faale-mafaufau, e aofia ai o tatou lagona, o tatou mafaufauga, o amioga, aemaise o le tatou soifua manuia lautele. E fesoasoani foi I le tatou taumafaiga e taulimaina mea e tutupu I ai tatou, pei o le atuatuvale ma le popole, o le fesootai atu I isi, ma le faia o tatou filifiliga. E taua tele le soifua maloloina o le mafaufau I laasaga uma o le olaga o le tagata, mai lava I le tamaitiiti, faasolo atu I le talavou seia o’o atu I le matua. O se tasi o vaega taua I le faatumauina pea o le soifua maloloina o le mafaufau o le tatou soifua manuia. E tatau ona tatou malamalama lelei e ese le soifua maloloina faale-mafaufau, ese le soifua manuia. O le lelei o le soifua manuia a se tasi, e mafai ona fesoasoani lea I le toe maua ma faatumauina pea le soifua maloloina o le mafaufau, ma e ala lea I le faia o se fuafuaga faatino e maua ai le soifua manuia. E eseese uma foi soifua manuia o tagata taitasi, o le mafuaaga foi lea e eseese uma ai fuafuaga faatino, ma o nei fuafuaga faatino e ao ona tusitusia ma faamaumau lelei mo le silafia aemaise o le malamalama oi latou e lagolagoina oe, po’o nisi foi o lo’o tausia oe. I le suesueina o le toe maua o le soifua maloloina faale-mafaufau, e aofia ai ni vaega taua se 4; 1. Vaega autu o le toe afua; e aofia ai le…. a. Faamoemoe – e tele ni tulaga ma mafuaaga e tatau ona faatumauina ai pea le tatou faamoemoe, e pei o le soifua umi ma ola I se olaga fiafia ma fua mai au galuega. e. Avea oe ma au lava matafaioi patino – e leai se isi e sili atu lona atamai po’o lona iloa ma malamalama ia te oe, nai lo’o oe lava ia. E te silafia lava e oe le mea e te manaomia, ma e tatau ona e pulea ma faatonutonu o oe lava ia. i. Aoaoga – e tele auala e mafai ai lava e le tagata ona aoaoina ia. Saili mea uma e mafai ona tatou maua e faatatau iai tatou lava ia ina ia mafai ona tatou faia ni faaiuga lelei e faatatau io tatou togafitiga, tausiga, galuega, mafutaga, o nofoaga e fia nofo ai, ma ni mea e fia faia I taimi paganoa. o. Fautua oe mo oe – avea oe ma fautua malosi mo oe lava ia. Ia e talitonu ia te oe lava ia, ma iloa au aia tatau, ma ia tausisi ma faaaloalogia ma tausia e isi. u. Lagolagoina- ia e fausia ma faatumauina se faiga e lagolago malosi ai oe e nisi pei o aiga, uo, ma I latou e tausia oe. 2. O mea faigaluega o le soifua manuia – ina ia fausia la oe lava FUAFUAGA FAATINO MO LE TOE MAUA O LE SOIFUA MANUIA, amata I le faia o se lisi o mea faigaluega mo le soifua manuia patino lava mo oe. O nei mea faigaluega e mafai ona aofia ai le faamalositino, malolo lelei, faia au fuafuaga faaleaso, o au talitonuga faaleagaga, taumafa paleni, ia atoatoa lelei lau faalogo, ma nisi lava mea e mafai na avea ma au mea faigaluega e te iloa e maua ai e oe le ola fiafia. 3. Fuafuaga faatino mo le toe maua o le soifua manuia – o ni faamaumauga/ faatonuga e pulea e oe lava oe ma ni faiga e ‘toe afua’ mo tagata o lo’o feagai ma tulaga eseese faaletino ma luitau tau I amioga. E mafai ona fesoasoani I tagata e ala I le faaitiitia ai lagona ma amioga o le atuatuvale, faatupulaia le faamalosiauina o oe lava mo oe lava, faaleleia ai le tulaga o le soifua, ausia ai faamoemoega. Manatua e eseese uma fuafuaga faatino mo tagata uma, e filifili e oe lava tulaga uma o lau fuafuaga, ae po o a uma foi mea e aofia ai I totonu. 4. Mataupu e faatatau I le ‘toe maua’- e mafai ona aofia ai le suia o mafaufauga faale-lelei I mafaufauga lelei, o mataupu tau I galuega e iai le amatalia o sau galuega fou, toe foi I galuega, feagai ma tagata faigaluega, ma nisi tulaga o mea tau I galuega, ma le tele o nisi tulaga po’o mataupu foi e mafai ona toe maua ai lou soifua manuia pe afai ua iai ni suiga. O vaega uma nei e tauaofai I le faia o se fuafuaga faatino e maua ai pea le soifua manuia ina ia faatupulaia ai ma tumau ai pea le tatou soifua maloloina faale-mafaufau. Manatua a soifua maloloina le mafaufau, e faapena foi ona lelei le tele o tatou mafaufauga, faaiuga faia, o tatou filifiliga, o tatou tala tatou te gagana mai ai. Aua a tatou le maua I le soifua maloloina faale-mafaufau po o le tatou soifua manuia fo’I, e mafai ona tatou o’o atu ai I nisi tulaga tatou te faia ai sauaga I o tatou aiga po o paaga foi.
0 Comments
Leave a Reply. |
