O FAIGA TUTUSA O ITUPA I LE TATOU LOTOIFALE

​Tusia:  Judy Mata’utia
 
Se tasi o faafitauli tele ma le ogaoga o lo’o faaauauina pea ona feagai ma I tatou I nei aso, o le tumau pea o le leai o se aia ma faiga tutusa o itupa I totonu o li’o o faiga malo I le lalolagi atoa, o le Pasefika, faapea foi tatou i Samoa nei.  O nei aso a tatou talanoa i faiga tutusa o itupa, e tatau ona iai se tauaofaiga e aofia ai tagata uma, tamaitai, alii, faapea ma faafafine ma vaega uma. O nisi o mataupu tau I itupa e a’afia ai le tele of atumotu o le Pasefika, e iai le tulaga maualalo o le auai o tamaitai I faiga malo, faaletonu tulaga o mea e faigaluega ai, sauaina o tamaitai, faateleina le lamatia I faamai pepesi e mafua mai I feusuaiga, ma faiga masani o le faailoga tagata.  Atonu e tele mafuaaga ma lu’itau e mafua ai le le lava o sui tamaitai e auai I mea fai ma vaega eseese, peitai o faiga le tutusa I le va o itupa, o se mafuaaga lea ua tele ona vaaia. 
 
O faiga le tutusa I itupa o se mataupu e faatatau I aia tatau a tagata ma o se taofiga po o le faatapula’aina lea o taumafaiga mo faiga tutusa ma le faatumauina.  O le faatalanoaina o nei mataupu, o lea mafai ona maua ai ni taunuuga lelei mo le faatupulaia o le tamaoaiga aemaise foi o le atinae lautele mo le tatou lotoifale.  E ui ina tele taumafaiga o faiga malo eseese, ma atumotu o le Pasefika ina ia iai faiga tutusa I totonu o atunuu eseese, peitai o lo’o vaaia pea le faaletonu I le aga’iga’i I luma.  O sauaga e faasaga I tamaitai I le Pasefika, aemaise foi o Amerika Samoa, o lo’o I se tulaga matautia.  O le Pasefika o le vaega o le lalolagi e pito sili lea ona pau numera, o le nofoia e tamaitai o nofoa I totonu o faiga malo o latou lava atunuu, ma atonu e iai le eseesega tele I mataupu e faasino I itupa, I le va o atumotu eseese o le Pasefika, ma e fuafua I le tulaga o le atinae o le tamaoaiga, o faiga masani ua masani ai le lautele, tulaga o le faitau aofa’i o tagata e nonofo I lea atunuu, ma le siosiomaga I totonu o le faiga malo, le au fai tulafono ma le au faitofi.
 
I le 2001 na maua mai le Matagaluega a Tina ma Tamaitai a Samoa faapea I totonu o laufanua o Samoa e iai le talitonuga lautele o lo o iai faiga tutusa I itupa, ma o tamaitai e tutusa ma o latou paaga po o alii foi.  O lo o faapea mai foi tagata Samoa, o tamaitai latou te umia ma saofafai mai I tulaga maualuluga I totonu o latou aiga, nuu ma afioaga, faapea ma le atunuu.  I le aganuu Samoa foi, o le tamaitai o le ioi mata o lona tuagane, ma o le tuagane na te tausi I lona tuafafine.  O le fesili tele la, po’o faapea lava na faia nei faiga i totonu o tatou aiga, nuu ma afioaga aemaise o le atunuu lautele?  O nei vaitau ua seasea lava o tatou toe vaaia ni tulaga faapea.  Ina ia mafai ona faia le tatou galuega o le faatamaia o sauaga, e tatau ona tatou malamalama I le tatou faaSamoa, aemaise o le avea ma se vaega o le talanoaga, pe faaaogaina o se punaoa e faatupulaia ai le faapalepale o tatou tagata I faiga e tineia ai sauaga mai o tatou aiga.
 
              O lo’o fesiligia pea e le toatele le mafuaaga e faasa ai e nisi o nuu ma afioaga ona faamatai tamaitai. 
O nisi o suesuega na maua ai faapea I nisi o taupulega a nuu, e vaaia pea le leai o se auai o tamaitai, ma o se faiga masani lea I totonu o le tele o nuu I Samoa faapea foi Amerika Samoa.  O nisi mafuaaga o le faasa o matai tamaitai I totonu o nuu ona o tapu a nuu po’o aiga pe mai tuaa ma o lo’o tausisi ai pea aiga.  O se isi itu o tiute ma matafaioi a itupa ua uma ona mavaevae e pei o alii e avea ma matai ao tamaitai e avea ma fautua.  O le va tapuia i le va o tamaitai ma alii atonu o se isi lea pogai ona e faafaigata ona nofoia faatasi I totonu o saofaiga a le nuu aemaise pea talanoaina mataupu e faatatau I mataupu ogaoga e iai sauaga ma nisi tulaga.  Atonu e faia foi tausuaga a alii I taimi o fonotaga a le nuu ma e mafai ona le fiafia I ai tamaitai, o nisi o tamaitai latou te ave le faamuamua I o latou tuagane, atalii, tane, po’o aiga foi ina ia latou pale I suafa matai ona o le talitonuga o tofiga mo alii.  O nisi mafuaaga e aofia ai le nofotane o tamaitai I nuu ma aiga o latou tane aemaise pe a leai se malamalamaga I tu ma agaifanua o lena nuu, ina ia mafai ona tauave ai tiute masani o le faamatai.  O faaalia mai ii, o le tele I le faaaloalo I le aganuu, e mafai ona taofia ai tamaitai mai le auai I nofoaiga a nuu aemaise o le iai I le faia o faaiuga.