FEFAATAUAIGA O TAGATA I AMERIKA SAMOA

Written by:  Judy Matautia, Training Coordinator
O Ianuari o le masina ua atofaina mo le faatupulaia ole malamalama ma le silafia aemaise o le puipuia mai i le faafitauli lenei o le fefaatauaiga o tagata. O se tasi foi lenei o sauaga o lo o faatupulaia i atunuu ma vaega eseese o le lagolagi, e a’afia ai ma Amerika Samoa, ma o Amerika Samoa fo’i, ua i ai lana tulafono e puipuia ai ona tagata mai lea ituaiga sauaga. I talaaga ma suesuega o lenei faafitauli atonu e mafai ona faapea nisi e le’o tupu i Samoa lenei ituaiga faafitauli, ma atonu e mafua ona tatou manatu faapea ona tatou te le’o malamalama tele i lenei faafitauli, ae po’o a faailoga vaaia, o ai tagata e ono tutupu ai, ae o ai foi i latou o lo o latou faatinoina lenei solitulafono, ae po o a ni auaunaga o lo o avanoa mo i latou ua sauaina, ae o ai e mafai ona sulu atu ai se tasi ua sauaina mo se lavea’i. E tele naua’i fesili e ono tula’i mai i lenei mataupu. 
O foliga nei o le faafitauli iinei i Amerika Samoa - o tatou sootaga faaleaiga atonu e fai ma pogai e mafua ai. E toatele tagatanuu Amerika Samoa o lo o latou aumaia ma faanonofo tagata o latou aiga mai Samoa po o nisi atunuu iinei, ma o nisi o nei tagatanuu o Amerika Samoa ua latou faasasa i nei tagata ona latou feoa’i, pe le faia foi o latou pepa faigaluega, ae ua na’o na faanofonofo i le fale, ma faia feau. O nisi ua faafaigaluega ae latou te le mauaina lava se seleni, ae e ave uma i le tagata o lo o nofo ai le tagata lea. O le fefaatauaiga o tagata e tutusa lava ma le faapologaina o tagata. E tele ona tatou faapea, o la e e faia o tatou galuega alofa i tatou aiga mai fafo, peita’i afai e le’o maua e tagata nei mai fafo se ola saoloto, ae na’o le faia o feau o aiga, le faigaluega leai foi se seleni, pe faigaluega ae leai lava se seleni, pe ma’i ae le avea i le falema’i, pe faasasa ona alu ese mai le fale, pe le faia foi pepa nofomau, ma nisi lava gaioiga le talafeagai, o lona uiga o lo’o sauaina lea tagata i sauaga o le fefaatauaiga o tagata – ua e aumaia se tagata mai se isi atunuu, atonu e le’o faatau atu i nisi tagata, ae o lo’o e faapologaina.  
O ai e tele ona sauaina, a’o ai foi e faatinoina – o tagatanuu o nisi atunuu o lo o fia saili manuia mai i totonu o Amerika Samoa ma e manaomia ona faia o latou pepa nofo mau e se tagatanuu o Amerika Samoa. O le fefaatauaiga o tagata e faatinoina e tagatanuu o Amerika Samoa o lo o latou aumaia tagata mai fafo e faanonofo i totonu o Amerika Samoa ae faaaogaina sese lea avanoa e pulea ma faapologaina ai nei tagata mai fafo. O sauaga i le fefaatauaiga o tagata, o se tasi lea o mataupu e tele ona le gaganaina pe faailoa mai ona o le tele o taimi e a’afia ai le aiga ma nuu. 
O lo o i ai ni auaunaga ma punaoa o lo o avanoa mo i latou ua sauaina I le fefaatauaiga o i latou, ae mo se lavea’i po o se fesoasoani vave, e tatau ona logoina le ofisa o leoleo. O sauaga o le fefaatauaiga o tagata, o lo o faatupulaia ma e ono mafai ona foia fo’i e le tatou aganuu. O le taumafaiga ina ia faaitiitia sauaga uma i Amerika Samoa, e manaomia tele ai le avea o le tatou aganuu faaSamoa ma se vaega tele o le faatalanoaga, pe faaaogaina le aganuu e fausia ai aoaoga e faatupulaia ma faamausaliina ai le ‘le taliaina’ e nuu ma afioaga o ituaiga amioga ma uiga faasaua. E maua le tatou malosiaga sili pea tatou faatasitasi ma galulue mo se lelei ma manuia o tatou nuu ma aiga, ma tatou taumamao mai ai ma le ola taotaomia, mafatia, ma le pologa ae ia faatumauina pea Samoa ma ona tagata I le ola saoloto!