E FOFO E LE ALAMEA LE ALAMEA

Written by:  Judy Matau'tia, Training Coordinator
E iai le talitonuga faasamoa, o vaifofo mo faafitauli ma mataupu eseese o lo’o a’afia ai o tatou nu’u ma aiga, o lo’o taoto i totonu o tatou lava aiga, nuu ma afioaga, pei ona i ai le alaga upu ‘e fofo e le alamea le alamea’. Ae pe faapefea ona maua lenei vaifofo e aiga ua faamalepeina ona o sauaga? O se tasi o malosiaga o tagata Samoa, o le tele o itu o le tatou aganuu, e faasino tonu i le faafaileleina o tatou mafutaga ma so’otaga ma isi faapea ma aiga, ma le tatou siosiomaga. Ae o le tele o tatou ua motusia o tatou so’otaga mai vaega ia o le tatou aganu’u, ona o ni mafuaaga se tele tatou te le mailoa. E tatau ona taumafai e talepe pa pupuni o lo’o taofia ai i tatou mai le feso’ota’i moni ma ia mafai ona maua ai aiga alolofa ma le saogalemu, lea e tatau lava ona i ai. E tatau ona faafailele ma tausia mai le laitiiti o ni ali’i latou te le faaaogaina sauaga e pulea ai ma le malosi o latou aiga. O lo o iai auala e mafai ona a’oaiina ai le fanau e aunoa ma le sauaina, ma ta’itaia se aiga e saoloto mai sauaga. E tatau ona fai ma masani le faatalanoaina o tulaga nei, o mataupu nei, o faafitauli nei i totonu o aiga, talanoa ina ia mafai ona fetu’utu’una’i tulaga uma nei i se auala saogalemu. E taua tele le feso’ota’i. O se tasi o suiga sili ona taua e tulai mai, o le mafai e aiga ona feso’ota’i i se auala vavalalata ma i latou e mafai ona fesoasoani e ta’itaia aiga nei ina ia ola e aunoa ma sauaga, ma o se a’afiaga lelei tele o lea itu, pe a mafai ona faia lava e tagata mai totonu o tatou lava nuu ma aiga. 
Ia tatou faamanatu ma le faaagaaga i mea e faamalosiauina ai i tatou, o vaega ia o le tatou faasinomaga o tagata Samoa, o tagata Pasefika, e fiafia ma matua faaeaina ai o tatou tagata, pei o le lotu, o ta'aloga, faafiafiaga, faiva alofilima, ma avanoa mo aiga e faatasitasi ai. Ae atonu e faigata mo nisi ona faia lea tulaga, aemaise lava pe afai e leo i ai se soifua manuia po’o le soifua maloloina, pe tele naua’i le popole, po’o le taumafai i aso taitasi ina ia iai pea se nofoaga e nonofo ai le aiga, po’o le tausia o taimaiti ma mea fai a le aoga. E faafaigata pe afai ua faamalepeina e sauaga le saogalemu a lou aiga. I le avea ai o tatou o se nuu, afioaga, atunuu, e tatau ona tatou mafaufauina pe faapefea ona faatupulaia avanoa e mafai ai ona tatou feso’ota’i i auala anoa ma le taua, ina ia mafai ai pea e tatou ona foia ma fofo o tatou faafitauli, ma mafai ona fesoasoani foi i nisi i lea lava itu.
O nisi nei o auala e 5, po’o ni gaioiga vave e mafai ona tatou fesoasoani ai e puipuia mai ai o tatou aiga ma uo, mai i sauaga, ona ua sili atu i le 2 vae 3 o tama’ita’i ma le 1 i le 12 ali’i ua a’afia i sauaga i totonu o aiga mai le latou olaga atoa. O nei numera e faailoa mai ai, ua matua’i tele naua’i. 1: Aua nei le amanaiaina. Afai e te faalogo ma vaai atu i ou tuaoi ua faia ni tulaga o sauaga, valaau leoleo. Atonu e faasaoina mai ai se ola o se isi. 2: Faalogo. Afai e ta’u atu e se isi ia te oe o lo’o feagai ia ma ni sauaga, faalogo e aunoa ma le faamasino. Talitonu i mea o lo’o faasoa atu ia te oe, ma fesili pe mafai faapefea ona e fesoasoani.
3: Fai ma siaki i taimi uma. Afai o lo’o lamatia se uo po’o se e pele ia te oe, fai ma masani le a’apa atu i ai e mautinoa ai o lo’o saogalemu ia. 4: Avea ma punaoa. Ofoina atu lou taimi e faia ai se mea e fesoasoani e faamama avega atu ai ma mafai ona taofiofi pe faalilolilo faamatalaga o mea ua tutupu. 5: Ta’ita’i e ala i faataitaiga. Aua nei lagolagoina faiga masani ia e pei e viia, faaeaina, pe si’itia ai sauaga e ala i musika, ata tifaga, televise, taaloga, ma nisi faiga tali tutusa. Talanoa i fanau ma le aiga i tulaga nei.
E fofo e tatou o tatou lava faafitauli, ma e mafai foi ona tatou a'apa atu i nisi mo se fesoasoani, ma o lou taumafai lena e fofo ma foia le faafitauli. E le mafai ona foia se mea, pe a tatou le gaioi mo se fofo, e pei lava o se faama’i e maua ai tatou, e le mafai ona tatou toe maua le malosi ma le manuia pe a tatou le saili fofo i le falema’i po’o le aapa atu i se taulasea. E faapena foi le tulaga o sauaga, a tatou le gaioi mo se fofo, e faapena pea ona faatupulaia pea sauaga i totonu o tatou aiga.   Ia tatou saili fofo mo sauaga o lo'o tula'i mai i totonu o tatou aiga ae le o le tatou faatali pe le amanaiaina foi. Fofo nei loa ae le'i tupu faapapala sauaga.