ALA I LE SAOGALEMU MO E UA A’AFIA I SAUAGA, MAI SE VAAIGA FAALE-FAUFAUTUA

Written by:  Judy Matau'tia, Alliance Training Coordinator
O se tasi o mea faigaluega taua mo I tatou o lo o fesoasoani pe faufautua mo I latou ua a’afia I sauaga, o le mafai ona tatou iloa o ni auala eseese e fesoasoani mo I latou ua sauaina, pei o le faia o fuafuaga mo le saogalemu, aemaise lava I taimi o le vevesi po o le le mautonu o le tagata.  Ae o lea lenei mea o le fuafuaga saogalemu? O se tonu po o se fuafuaga mo le saogalemu ua faamalamalamaina lea, o ni faaiuga o ni fuafuaga ua tusia aloaia, ma avea pe fai ma faiga faapitoa ina ia mulimulita’I I ai nisi o lo o I se nofoaga ese mai le o lo o sauaina, aua le taimi e tula’i mai ai se faalavelave faafuasei. Ae o lea a se fuafuaga mo le saogalemu mai sauaga faalotoifale? O lea fuafuaga mo le saogalemu o se fuafuaga e patino ia te oe lava ia ma e mafai ona e faatinoina, e aofia ai auala e mafai ai ona saogalemu se tasi ao I ai I se mafutaga ma se isi, po o faamoemoe e tuua le mafutaga, pe ua tuua foi le mafutaga. O le fuafuaga mo le saogalemu e aofia ai foi le mafai ona taulima o faalogona, faasoa I aiga ma uo le tulaga o lo o sauaina ai oe, ma ia faia nisi tulaga e pei o le molia I le tulafono. O le fuafuaga mo le saogalemu e fesoasoani ina ia faaitiitia ai le pulea o se ua sauaina e lana paaga po o le tau faamata’u, e faatupulaia ai le saogalemu o fanau ma I latou ua a’afia, ae aua nei galo o le saogalemu e mafai ona faaupuina faalauaitele ma e uiga eseese le saogalemu mo tagata uma. 
Ina ia aoga lelei se fuafuaga mo le saogalemu, e tatau I le faufautua ona silafia uma tulaga e faatatau I le ua a’afia I sauaga – pei o manaoga, punaoa e aoga po o avanoa mo lea tagata, aganuu, tu ma aga masani, mafaufauga ma le malamalama o le o lo o sauaina. E tatau foi ona fausia se mafutaga fegalegalea’i, galulue faatasi aemaise o le fetalitonua’i i le va o le faufautua ma le ua sauaina, ina ia mafai ona faatinoina ai o fuafuaga faapea ma le fetu’utu’una’i e fuafua i fesuiaiga o le olaga o le ua sauaina. O le faufautua faatulagaina mo e ua sauaina o se auivi mo le galuega o le faufautua e tuusao ma atoatoa, ma I lona faagalueaina, e manaomia ai se autelega o ni tomai faapitoa, o le malamalama ma le mafai ona faia o faaiuga. 
Ia manatua e le faufautua I taimi uma, o le taimi e tuua ai le mafutaga saua e le ua a’afia I sauaga, o se tasi lea o taimi le saogalemu mo ia, ae afai o faia ma faataunuuina se tonu mo le saogalemu, ia taga’i toto’a ma saga lapataina pea ina ia saofaga uma fuafuaga ina ia maua ai le saogalemu. Mo le saogalemu, ia faamalosia I latou ua sauaina ina ia faamaumau uma gaioiga saua o lo o feagai ma latou, ia iloa uma ala e ulufafo faavavevave ese ai mai se nofoaga, taofia numera taua ma faia ni faailo po o ni faailoga i upu ma tala e saunoa ai e iloa ai o lo o iai le mea o lo o tupu, ave ese ni aupega malolosi mai le fale e ono afaina pe lavea ai se isi, utu le kesi o le taavale ina ia mafai ona vave alu ese ai mai le nofoaga o sauaga, ma ia iai sina teuga tupe po o se seleni e mafai ona faaaogaina I le taimi ua alu ese ai. A’o sauni se tasi e tuua se mafutaga saua, ia faaleoleo se seleni mo mea e manaomia, saunia se ato e mafai ona vave tagofia ma alu loa, ma ia iai totonu mea taua e mana’omia, vaai lelei se taimi e alu ese ai, feso’ota’i leoleo mo se fesoasoani, faafeso’ota’i se loia, faafeso’ota’i auaunaga o lo o mafai ona puipuia ai fanau. 
I le maea ai ona tuua o se mafutaga sauaina, ia fautuaina le ua sauaina ina ia I ai se telefoni ma se numera fou mo le telefoni, faaauau pea ona faamaumau uma gaioiga ma mea o lo o tutupu, sui loka o fale ma taavale, alu atu I se nofoaga o lo o fai ma to’omaga, a mafai aua nei nofo toatasi, ae faia ni feiloaiga ma le o lo o faia sauaga ia feiloai I ni nofoaga faitele, suia mea e masani ona faia I aso taitasi, ma ia faaauau ona maua feiloaiga a le faufautua ma le ua sauaina. O le tiute a le faufautua e tatau ona manatua I taimi uma: o ia e faasoa ma tuufaatasi le tele o faamatalaga ma ia tamaoaiga I le malamalama I ala uma e tatau ona uia ma faaleleia atili se fuafuaga mo le saogalemu ua maea ona faataatia. E aoga tele le fuafuaga mo le saogalemu pe a mafai ona galulue faatasi le faufautua ma le ua sauaina.