A LEAI SE GAGANA UAPO LE NU’U

(Tusia: Judy Mata’utia)
I le masina ua se’i mavae atu nei o Aukuso, na faatupula’ia ai le talanoaina o le taua o le faaaogaina o le tatou gagana Samoa. I nisi o su’esu’ega o tagata Samoa ua taua ai o le gagana o le auivi o feso’ota’iga a tagata e ala lea i le faaaogaina o upu. I le tatou faaSamoa, o le gagana aemaise o le faaaloalo, o nisi ia o faavae taua o le tatou aganuu e pei ona taua e Fofo Sunia, ‘o le tatou gagana e faavae ai, e fusi ai, e ta’ui ai foi ma teumau ai ana aganuu’(Sunia 2000). E feso’ota’i ai tagata uma e ala i le gagana ma mafai ona faailoa ai manatu, mafaufauga faapea ma lagona, pe mafatia po’o le fiafia foi. O le gagana e faatino ai le aganuu, a leiloa le gagana ua leai se aganuu. Tusia e se tina iloga o Samoa, le afioga i le foma'i ia Aiono Fanaafi Le Tagaloa e faapea ‘A leai se gagana ona po lea o le nuu’(Fanaafi 1996), aua ua leai se iloa, leai se malamalama o le isi i le isi, le faailoa ai manatu ma lagona. O lo’o faamatalaina mai e le tatou gagana auala e tatau ona tatou nonofo faatasi ai o se aiga, ma le faiâ ma isi, o tatou nofoaga ma le si’osi’omaga, ma tatou tapuaiga.   O le tatou gagana tatou te iloa ai o tatou tu ma aga e tatau ona tatou faatinoina i taimi e feagai ai ma fetaia’iga faigata faale-tagata.
Fetalai le afioga i le tama-a-aiga, Tuiatua Tupua Tamasese Efi, ‘A faaumatia se gagana, e faaumatia foi ma tala faasolopito and suia ai ma faasinomaga o ni tagatanuu. O i’i foi la o lea leiloa ma lilo atu ai i le lumana’i le so’otaga sili a le tuana’i ma le taimi nei’ (Tui Atua, 2008). O le mou atu o se gagana, e mou faatasi atu ai ma pine faamau, talanoaga, ma feagaiga pei o talatu’u na fuafuaina mo augatupulaga o le lumana’i, faatasi ai ma le mou atu o se aganuu. O le gagana a tagatanuu, o le faaolataga lea mo tu ma aga’ifanua o tagatanuu. 
O le tatou gagana e si’itia ma vi’ia ai tagata, ae mafai fo’i ona faato’ilaloina ai nisi i le tatou gagana, e ala lea i le faaaogaina o tatou upu ma tala e faaleaga, faatiga, faamanu’aina, faanoanoa, ma faatauemu ai i nisi. O le tatou gagana ua faatinoina ai misa'aga ma vevesi i totonu o lotoifale, ua talepeina ai mafutaga, ua fetu’u ai foi e matua o latou fanau ona o le toatama’i, ua tatou tu’ua’ia ai foi i latou ua sauaina ae le tu’ua’ia le na faia sauaga, ma ua malepe ma fetaua’i ai faiga malo ma ekalesia eseese. I se isi itu ua tatou sauaina tagata i tatou upu lafo, po’o o sauaga i upu ma tala. 
O se isi itu e taua tele le tatou malamalama lelei i ai, o le malosiaga lea o sauaga, lea e le faagaganaina ai le tagata. O le toatele oi latou ua a’afia i sauaga, e tele ona le fia faatalanoaina tulaga o sauaga ua sauaina ai i latou, aemaise lava sauaga faafeusuaiga. E mafua mai ona a le ma, e fefe le tagata e faailoa mai o ia ua sauaina, ona e faapea o sauaga nei e mataga, pe le talitonuina ia e nisi. E taua le taumafai ina ia ave ese ia faiga po’o tu ma aga masani o le le gagana e faailoa mai sauaga, aua e tumau ma faaauauina ai lava sauaga. 
O se isi itu taua o le tatou gagana o le tatou iloa o faamatalaga e faia ina ia faato’ato’a ma fesoasoani ai i se isi ua a’afia i sauaga. O se fesili po’o se faamatalaga le talafeagai e faia, atonu e mafai ona aveesea ai le fia faasoa mai o le ua a’afia i sauaga aemaise o le faailoa mai o mea na tutupu ia te ia. O nisi fo’i o taimi, atonu o le leai o se tala e faia e mafai ona avea ma to’omaga mo nisi, pau o lea o le tatou auai faatasi ma ia, tusa pe le faaleoina ni manatu. E ui ina taua le iai o le tatou gagana, ae faapea fo’i ona taua o le tatou iloa o le tala e fai faapea ma le taimi e faia ai, aemaise lava pea faia le tatou galuega faale-faufautua po’o le tatou fesoasoani atu i nisi. Mo le tatou galuega faifai pea o le taumafai e taofia sauaga, tatou faaaogaina le tatou gagana tatou te faailoa ai tulaga i sauaga, tatou talanoa i le taua o le puipuiga o tatou aiga ina ia taumamao mai sauaga ona e fai sina ogaoga ma le matuia o ona a’afiaga. Tatou taumafai ina ia faaaogaina le tatou gagana tatou te talanoa ai i ni auala e faatupula’ia ai le tatou malamalama i nei mataupu ma ni auala e puipuia ai tagata uma i totonu o nuu ma afioaga ta’itasi. Tatou taumafai ina ia faaaogaina le tatou gagana tatou te talanoa ai i le fausiaina ma le faaaogaina o upu faaaloalo, migao, aemaise o le alofa tatou te feso’ota’i ai ma faailoa ai o tatou faalogona. Tatou taumafai ina ia faaaogaina le tatou gagana tatou te taofia ai sauaga, ma aveesea ai le pogisa mai totonu o tatou aiga, aua e le mafai ona tatou gafa taulimaina pe galulue aga’i le faatama’ia o sauaga, sei vagana ua tatou faatalanoaina ma fefaasoa’i muamua i nei faafitauli. Aua a leai, ona faatumauina ai lava lea o le po, a’o lea e fai mai ua ao Samoa!