​O LE TAUMULIMULI LE FAATAGAINA

Tusia: Judy Mata’utia
A tatou malamalama atili e faatatau i uiga o le taumulimuli le faatagaina, atonu o lea mafai ona maitauina ai nei uiga ae le’i faatupu teleina, ma atonu o lea mafai ai ona faia ni tulaga e ono puipuia mai ai tatou.  Afai e te silafia o lo’o taumulimuli se isi ia te oe- i le lautele, i luga o le upega tafailagi, po’o faia i nisi tulaga faatekonolosi – e mafai ona e maua i le faalogona le mautonu ma le lamatia.  E tatau ona faia ni la’asaga ma fuafuaga e puipuia ai oe po’o le a’apa atu i se isi e mafai ona fesoasoani ia te oe.
O lea le taumulimuli le faatagaina?O ni faiga faifaipea e le mana’omia, o ni faiga faalavelave po’o nisi lava faiga e faasaga i se tasi ina ia lagona ai le fefe.  E pei o soligatulafono e faatatau i sauaga  tau feusuaiga, e faapena le taumulimuli le faatagaina – e faatatau uma lava i le fiamalosi ma le fiapulea.  E eseese faauigaina o le tulafono o le taumulimuli le faatagaina i totonu o setete taitasi ma e faapena foi le tele o amioga eseese e maitauina ai le taumulimuli le faatagaina, e aofia ai:

• Tau faamatau se tasi, po’o sui o se aiga, po’o uo fo’i
• Feso’ota’iga e le’i malilie faatasi ai, e pei o le telefoni ma imeli faafia, ma meaalofa e le’o manaomia
• O le vavalalata faaletino ae faifai so’o, o le faatalitali mo se tasi e taunuu i se nofoaga, taumulimuli i se tasi, po’o le maitauina o se tagata mai se mea mamao
• Nisi gaioiga e faia e feso’ota’i, faalavelave, faafefe, po’o le tulituliloaina o se tasi

Faaaogaina o tekonolosi e taumulimuli le faatagaina ai. Se tasi o auala ua taumulimuli le faatagaina ai i latou e faia lea tulaga, ua faia lea e ala i le faaogaina o faiga faatekonolosi.  Atonu ua e faalogo i sauaga i luga o le upega tafailagi e faaogaina mo nei ituaiga feso’ota’iga.  O nisi ia o faiga faatekonolosi ua mafai ona taumulimuli le faatagaina ai i latou e faia lea amio:

• Faaauauina ma faifaipea feso’ota’iga le mana’omia e pei o le imeli faalausoso’o e tusa lava pe le’o tali atu i ai
• O le faia o faasalalauga tau faamata’u po’o le faailoa atu o faamatalaga e faatatau i se isi tagata i luga o vaega eseese o le upega tafailagi, e aunoa ma se faatagana
• O le tapu’eina o ata, po’o le faapipi’i o masini pu’e ata e matamata mai ai le o lo’o taumulimuli ma iloa mai mea o lo’o faia e le isi tagata, e aunoa ma se faatagana ma le iloa
• Faaogaina o polokalame ma masini e iloa ma maua ai se nofoaga o lo’o e iai, e aunoa ma lou silafia po’o se faatagana fo’i
• Faaogaina o se komepiuta a se isi tagata e siaki ai au gaioiga i luga o lau lava komepiuta, e aunoa ma sou iloa po’o se faatagana

​A’o faaauau pea le faatupulia o tekonolosi ma faamauamauga faakomepiuta, faapea foi le faaauau pea o avanoa e mafai ai e se tasi ona feso’ota’i ma oe i uiga ma faiga tau feusua’i e le’o mana’omia.  E le o nei amioga uma e taua o le taumulimuli le faatagaina, ae e mafai ona lagona ai le fefe o se tasi.  O nisi o uiga masani e lagona ona ua iloa o lo’o taumulimuli le faatagaina se isi ia te oe:

• E faaogaina le upu o le ‘fefe’ e faauigaina ai tulaga uma e faatatau i le iai o se tagata o lo’o ia taumulimuli le faatagaina ia te oe
• E mafai ona lagona le popole, popolevale, faaesea, po’o le amata ona iai faailoga o le atuatuvale ia te oe

O le a le mea e tatau ona faia pe afai o lo’o taumulimuli le faatagaina se isi ia te au? Afai e te manatu o lo’o taumulimuli le faatagaina se isi ia te oe, ia e iloa ua tatau ma onomea lou popole.  E mafai ona faatupulaia uiga faaletonu o le o lo’o taumulimuli le faatagaina ia te oe.  Manatunatu i nisi nei o mea e tatau ona faia e faatupulia ai lou saogalemu ma mafai ona ripoti atoatoa ai le solitulafono:

• Taumafai e alo ese mai le tagata o lo’o taumulimuli le faatagaina ia te oe.  Atonu e iai taimi e faigata ai, aemaise lava pea masani lelei le tagata lea ia te oe po’o lou aiga fo’i
• Afai o lo’o faia nei uiga le mana’omia i luga o le upega tafailagi, pei o imeli po’o feau tusitusia, ia faailoa manino i ai e te mana’o e taofi le faafeso’ota’i atu ia te oe.  O le taimi lava e te faamanino i ai lea tulaga, aua nei toe tali atu i nisi o feso’ota’iga
• Taofi so’o se faamaoniga e maua mai le tagata o lo’o taumulimuli le faatagaina ia te oe, e pei o imeli, feau tusitusia, afiafi, ma nisi mea, ae aua le tali i ai.  E mafai ona e tapu’eina ata o talanoaga po’o le lolomiina fo’i o imeli ma feau tusitusia mo faamaoniga o sau tagi
• Faailoa i aiga, uo, pule o lau galuega ma tagata o lo’o tou galulue faatasi le tulaga o lea tagata o lo’o taumulimuli le faatagaina ia te oe
• Manatunatu ma mafaufau ina ia ripotia le mataupu i le ofisa o leoleo
• Tausia sau api e faamaumau uma ai mea uma o lo’o tutupu e faatatau i le taumulimuli o se isi ia te oe.  Faamaumau lelei nofoaga, o taimi ma aso o se mea na tupu ma ia teu lelei lau api
• Ia faamasani i le faaogaina o komepiuta ma le saogalemu ma auala e puipuia ai ao luga o le upega tafailagi

 
Mo nisi faamatalaga e faatatau i le taumulimuli le faatagaina, faafeso’ota’i mai Le Mau i le (684)699-0272.